महाराष्ट्राचे राज्यमंत्री बच्चू कडू यांना न्यायालयाकडून अटकपूर्व जामीन मंजूर

अकोला जिल्हा परिषदेकडून जिल्हा नियोजन समितीकडे पाठविलेल्या रस्त्यांच्या प्रस्तावात पालकमंत्री बच्चू कडू यांनी एक कोटी ९५ लाखांचा निधीचा अपहार केल्याचा ठपका वंचित बहुजन आघाडीने केला होता. या प्रकरणी आपल्याला अटकपुर्व जामीन मिळावा अशी मागणी कडू यांनी केली होती. यावर आज जिल्हा सत्र न्यायालयाने कडू यांचा आज अटकपुर्व जामीन अर्ज मंजूर केला आहे. (Minister of State Bachchu Kadu granted pre-arrest bail by court )

ही तक्रार 24 मार्च रोजी दाखल झाल्यानंतर न्यायालयाने कलम 156 (3) नुसार पालकमंत्री बच्चू कडू यांच्याविरोधात गुन्हा दाखल करण्याचे आदेश दिले होते. त्यानुसार कडू यांच्याविरोधात गुन्हा दाखल झाला. अकोला शहर कोतवाली पोलीस ठाण्यात वंचित बहुजन आघाडीचे प्रदेश उपाध्यक्ष डॉ. धैर्यवर्धन पुंडकर यांनी दिली होती.

त्या तक्रारीवर न्यायालयाच्या आदेशान्वये कारवाई करून हा गुन्हा दाखल करण्यात आला होता. पालकमंत्री लोकसेवक असल्याने गुन्हा दाखल करण्यासाठी ९० दिवसांच्या आत राज्यपालांची परवानगी घेण्याचे आदेश न्यायालयाने दिले होते. दरम्यान,वंचितच्या नेत्यांनी राज्यपालांची भेट घेऊन या प्रकरणात लक्ष घालण्याची विनंती केली होती.

राज्यपालांनी कायद्यानुसार दस्तऐवज सादर करण्याचे सांगितले होते. तसेच राज्यपालांनी नियमानुसार कारवाई करण्याचे आदेशही प्रशासनाला दिले होते. तसेच पोलिसांनी राज्यमंत्री कडू यांचे विरोधात भादंवि कलम 405, 409 , 420, 468 , 471 नुसार गुन्हा दाखल केला होता.