Maharashtra: अमरावतीत 800 मुस्लिम मुलींचे धर्मांतर? RSS च्या नावे व्हायरल झालेल्या पॅम्प्लेटवर अबू आझमींचे सवाल

Maharashtra News: राष्ट्रीय स्वयंसेवक संघाच्या नावाने एक पत्रक सोशल मीडियावर मोठ्या प्रमाणात व्हायरल होत आहे. आरएसएसने अशा कोणत्याही पॅम्प्लेटला खोटे ठरवले असले तरी समाजवादी पार्टीचे महाराष्ट्राचे नेते अबू आझमी यांनी काही सवाल उपस्थित केले आहेत.

अमरावतीतील 800 मुस्लिम मुलींच्या धर्मांतर प्रकरणाची चौकशी करण्याची मागणीही त्यांनी केली. आरएसएस किंवा इतर हिंदू संघटनांना बदनाम करण्याचा कट रचणाऱ्या अराजकतावादी घटकाचाही यात हात असू शकतो, अशी भीती त्यांनी व्यक्त केली आहे.

दरम्यान, सपा नेते अबू आझमी यांनी सांगितले की, या पत्रकाच्या संदर्भात मी गृहमंत्र्यांना भेटायला गेले होतो, पण त्यांची भेट होऊ शकली नाही. मात्र प्रकरण गंभीर असल्याने मी पुन्हा गृहमंत्र्यांची भेट घेण्यासाठी जाणार आहे.'

दुसरीकडे, आरएसएसचे (RSS) प्रवक्ते सुनील आंबेकर यांनी ट्विटरवर व्हायरल झालेले पॅम्प्लेट बनावट असल्याचे म्हटले आहे. यासंदर्भात त्यांनी ट्विटही केले आहे. सपा नेते अबू आझमी म्हणाले की, केवळ मध्य प्रदेशातच नाही तर महाराष्ट्रातही हे पत्रक सोशल मीडियावर मोठ्या प्रमाणात व्हायरल होत आहे.

दुसरीकडे, या पत्रकाद्वारे लँड जिहाद आणि लव्ह जिहादच्या नावाखाली वातावरण बिघडवण्याचा आणि लोकांना चुकीच्या गोष्टींसाठी प्रवृत्त करण्याचा प्रयत्न केला जात आहे. अशी पत्रके वाटली जात आहेत, ज्यात मुस्लिम मुलींना हिंदू बनवण्याचे षडयंत्र रचले जात आहे.

यामागे हिंदू संघटना असू शकतात, अशी भीती त्यांनी व्यक्त केली. हिंदू संघटनांच्या नावाखाली काही अराजक घटकांकडून असे कृत्य होण्याची दाट शक्यता आहे. त्यामुळे या प्रकरणाची तातडीने सखोल चौकशी व्हायला हवी.

आझमी पुढे म्हणाले की, 'त्यांचा उद्देश आरएसएस किंवा इतर कोणावरही आरोप करणे हा नव्हता, परंतु हा मुद्दा इतका गंभीर आहे की त्याची त्वरित चौकशी झाली पाहिजे.' \

ते पुढे असेही म्हणाले की, 'या पत्रकात मुस्लिम मुलींशी संबंध कसे ठेवायचे, त्यांच्याशी मैत्री कशी करायची आणि शारीरिक संबंध कसे ठेवायचे? हे सांगण्यात आले आहे.'

आझमी म्हणाले की 'हे तेच लोक आहेत, जे हिंदू (Hindu) आक्रोशच्या नावाखाली सतत रॅली काढतात आणि धर्मांतरासह इतर आरोपाखाली मुस्लिमांना त्रास देतात.'

तसेच, याच लोकांनी अकोला अहमदनगरमध्येही मुस्लिमांचा छळ केला. लव्ह जिहाद कायद्यावर आपला आक्षेप नाही, मात्र या कायद्याच्या नावाखाली संविधानाची खिल्ली उडवण्यास विरोध होत असल्याचे त्यांनी सांगितले.

अबू आझमी म्हणाले की, 'अशी संवेदनशील पत्रिका सोशल मीडियावर व्हायरल होत आहे.' अशी पत्रिका वाटून सोशल मीडियावर व्हायरल करणारे कोण आहेत, असा सवालही त्यांनी उपस्थित केला. ज्यामध्ये विशेषत: मुस्लिम मुलींना शिकार बनवण्याचे म्हटले आहे.

या पत्रकाबद्दल आपला आक्षेप आहे, मात्र तक्रार कोणाकडे करायची, असेही ते म्हणाले. गृहमंत्र्यांना भेटायला गेलो होतो, पण भेट झाली नाही, असेही त्यांनी सांगितले.

शेवटी आझमी म्हणाले की, 'हे सर्व तेव्हा होईल जेव्हा सरकार स्वतः केरळ स्टोरी सारख्या चित्रपटांना प्रोत्साहन देईल.' मात्र, अमरावतीतील 800 मुलींच्या धर्मांतर प्रकरणाची चौकशी व्हावी, असेही ते म्हणाले. यात तथ्य असेल तर यामागे कोण आहेत हे उघड करुन त्यांच्यावर कारवाई झाली पाहिजे.