एस टी कर्मचाऱ्यांच्या मागण्या मान्य करा नाही तर...:सदाभाऊ खोत

मुंबई: ST कर्मचाऱ्यांचा संप सुरु आहे. त्यांच्या मागण्या मान्य होत नाहीत तो पर्यंत हा संप सुरु राहणार आहे असे ST कर्मचाऱ्यांकडून सांगण्यात आले आहे. या सुरु असलेल्या संपात गोपीचंद पडळकर व सदाभाऊ खोत यांनी आझाद मैदानावर ठिय्या मारला असून आंदोलनस्थळी रात्री झोपले.

'मराठी माणूस टिकला पाहिजे' असा दिखावा एकीकडे करायच्या आणि दुसऱ्या बाजूला याच मराठी माणसाला निलंबित करायचे. यातून असे दिसून येते की मराठी माणूस टिकला नाही तर निलंबित झाला पाहिजे, अशी सरकारची मानसिकता आहे. असा घणाघात माजी मंत्री सदाभाऊ खोत (Sadabhau Khot) यांनी यावेळी केला.

सदाभाऊ खोत माध्यमांशी बोलताना म्हणाले की, राज्यामध्ये 30 पेक्षा जास्त एसटी कामगारांनी आत्महत्या केल्या. एस टी कर्मचायऱ्यांच्या काय मागण्या आहेत याची विचारपूस करायला सुद्धा सरकारकडे वेळ नाही. सरकारकडून हजारो जणांना निलंबित केले. सरकारची ही दादागिरी आम्ही चालू देणार नाही. उध्दव ठाकरे (Uddhav Thackeray) हे माणूस म्हणून चांगले आहेत. त्यांनी परिवहन मंत्री अनिल परब यांना योग्य त्या सूचना द्याव्यात आणि हा प्रश्न मार्गी लावावा. योग्य तोडगा न निघाल्यास थेट परब यांच्या घरावर मोर्चा काढू. आता उग्र आंदोलन करण्यासाठी कर्मचारी आता कोणत्याही परिस्थितीमध्ये मागे हटणार नाही.

ST कर्मचारी हे त्यांच्या मागण्यांवर ठाम आहेत. त्यामुळे शासनाने निलंबनाच्या कारवाईचा बडगा कर्मचाऱ्यांवर उचलला आहे. यामध्ये रायगड जिल्ह्यातील आठ आगारातील 19 चालक, वाहक आणि यांत्रिकी विभागातील कर्मचाऱ्यांना निलंबन केले आहे, अशी माहिती जिल्हा वाहतूक नियंत्रक अनघा बारटक्के यांनी दिली आहे. तसेच कर्मचाऱ्यांवर निलंबनाची कारवाई केली आहे. आता मात्र माघार नाहीच असा पावित्रा कर्मचाऱ्यांनी घेतला आहे.

प्रवाशांची गैरसोय टाळण्यासाठी रायगड आगाराकडून जिल्ह्यात पुन्हा एसटी वाहतूक सुरू केली होती. परंतु 8 नोव्हेंबर पासून पुन्हा 8 आगारातील कर्मचाऱ्यांनी संप पुकारला. संप मागे घ्यावा यासाठी जिल्हा वाहतूक प्रशासनाकडून विनवणी करण्यात आली होती. तरीही संप सुरूच होता. तसेच जिल्ह्यातील 19 कर्मचाऱ्यावर निलंबनाची कारवाई केली. यामुळे कर्मचाऱ्यांत संतापाची भावना झाली आहे.