Konkan Railway: चाकरमान्यांसाठी आनंदाची बातमी! उन्हाळी सुट्टीनिमित्त 'कोकण रेल्वे' मार्गावर धावणार मुंबई ते गोवा विशेष एसी ट्रेन

सावंतवाडी: उन्हाळ्याच्या सुट्ट्यांचा हंगाम सुरू होताच कोकणात जाणाऱ्यांची संख्या मोठ्या प्रमाणात वाढते. विशेषतः एप्रिल आणि मे महिन्यांत कोकणात जाणाऱ्या प्रवाशांची प्रचंड गर्दी होते. ही वाढती मागणी लक्षात घेऊन कोकण रेल्वे प्रशासनाने प्रवाशांच्या सोयीसाठी अतिरिक्त विशेष गाड्या सोडण्याचा निर्णय घेतला आहे.

कोकण रेल्वेने उन्हाळी हंगामात अतिरिक्त साप्ताहिक एसी गाड्या सुरू करण्याची घोषणा केली आहे. यामध्ये गाडी क्रमांक ०१०५१/०१०५२ लोकमान्य टिळक टर्मिनस (एलटीटी) - करमळी - लोकमान्य टिळक टर्मिनस या मार्गावर साप्ताहिक विशेष गाड्या धावणार आहेत.

गाडी क्रमांक ०१०५१ लोकमान्य टिळक (टी) ते करमळी एसी स्पेशल ही गाडी ११ एप्रिल ते २३ मे २०२५ या कालावधीत दर शुक्रवारी रात्री १०:१५ वाजता लोकमान्य टिळक टर्मिनस (टी) येथून सुटेल. दुसऱ्या दिवशी म्हणजे शनिवारी दुपारी १२ वाजता करमळी स्थानकावर पोहोचेल.

गाडी क्रमांक ०१०५२ करमळी ते लोकमान्य टिळक (टी) एसी स्पेशल करमळी येथून परतीची गाडी १२ एप्रिल ते २४ मे २०२५ या कालावधीत दर शनिवारी दुपारी २:३० वाजता सुटेल. ही गाडी दुसऱ्या दिवशी रविवारी पहाटे ४:०५ वाजता लोकमान्य टिळक (टी) पोहोचेल.

या विशेष गाडीमध्ये एकूण २० डबे असतील. ठाणे, पनवेल, पेण, रोहा, माणगाव, वीर, खेड, चिपळूण, संगमेश्वर रोड, रत्नागिरी, आडवली, विलावडे, राजापूर रोड, वैभववाडी रोड, नांदगाव रोड, कणकवली, सिंधुदुर्ग, कुडाळ, सावंतवाडी रोड आणि थिवी या प्रमुख स्थानकांवर गाडी थांबेल.