Sangli News : महाराष्ट्रात पाणथळ रक्षणाचे आव्हान : राजेंद्र केरकर

Sangli News : सांगली, महाराष्ट्रात नैसर्गिक वृक्ष आच्छादन घटत आहे. त्यामुळे पक्षांचा अधिवास संकटात आहे.

हे रोखण्यासाठी पाणथळ स्थळांचे रक्षण करण्याबरोबर ग्रामीण शहरी भागात जैवविविधता मंडळे सक्रिय करणे गरजेचे आहे, असे मत गोव्यातील नदी आणि जंगल संवर्धन क्षेत्रातील तज्ज्ञ राजेंद्र केरकर यांनी मांडले.

शांतीनिकेतन मध्ये ३६ वे पक्षीमित्र संमेलनाचे उद्‍घाटन शनिवारी (ता. २३) सकाळी त्यांच्याहस्ते झाले. यावेळी भारती विद्यापीठ पर्यावरण विज्ञान विभाग प्रमुख आणि पक्षिमित्र डॉ. एरिच भरूचा, फेदर लायब्ररीच्या ईशा मुन्शी,

स्वागताध्यक्ष डॉ. रविंद्र व्होरा, महाराष्ट्र पक्षिमित्र संघटनेचे अध्यक्ष डॉ. जयंत वडतकर, डॉ. अजित उर्फ पापा पाटील, बर्डसाँगचे संस्थापक अध्यक्ष शरद आपटे, डॉ. गजानन वाघ, डॉ. तुळजापुरकर, सुनिल करकरे आदींची उपस्थिती होती.

केरकर म्हणाले, ‘सर्वाधिक धरणाची संख्या असणाऱ्या महाराष्ट्र पाण्याच्या दुर्भिक्ष्याला सामोरे जात आहे. गोव्यात जैवविविधता समित्या मार्फत लोक जैवविविधता नोंदीचे जे काम चालू आहे, त्यातून महाराष्ट्राने प्रेरणा घेण्याची गरज आहे.’

संमेलनात सकाळी दहा वाजता ग्रंथदिंडी काढण्यात आली. अजित पाटील यांच्यावर माहितीपट दाखवण्यात आला. संमेलनात फेदर लायब्ररीच्या ईशा मुन्शी यांनी पक्षांची पिसे याविषयी सादरीकरण केले. जयसिंगपुर येथील श्रेयस मानगावे यांनी पक्ष्यांच्या पिसांवरुन केलेले संशोधन सादर केले.