Akasa Air चा सावळा गोंधळ, पुण्यात सुरक्षा तपासणी विलंबामुळे सहाजण गोव्यातील शूटिंग चॅम्पियनशिपला मुकले

पुणे: विमानतळावर झालेल्या सुरक्षा तपासणीच्या विलंबामुळे सहा नेमबाजांना गोव्यात होणाऱ्या शूटिंग चॅम्पियनशिप स्पर्धेला मुकावे लागले आहे. अकासा एअरच्या शस्त्रे आणि दारूगोळा वाहतुकीबाबतच्या धोरणांबद्दल गोंधळ निर्माण झाल्याने तपासणीला विलंब झाला. गोव्यात होणाऱ्या वेस्टर्न झोन ज्युनियर (अंडर-१८) शूटिंग चॅम्पियनशिपमध्ये भाग घेण्यासाठी सात नेमबाज मंगळवारी (१६ सप्टेंबर) संध्याकाळी पुण्याहून गोव्याला निघाले होते.

समोर आलेल्या माहितीनुसार, पुण्यातून सात जणांची एक टीम गोव्यात होणाऱ्या वेस्टर्न झोन ज्युनियर (अंडर-१८) शूटिंग चॅम्पियनशिपमध्ये भाग घेण्यासाठी मंगळवारी जाणार होती. ही टीम अकासा एअरच्या QP-११४३ या फ्लाइटने संध्याकाळी ५:२५ वाजता पुणे विमानतळावरुन गोव्यासाठी निघणार होती. यासाठी टीम दुपारी २:३० वाजता विमानतळावर दाखल झाली.

विमानतळावर दाखल झाल्यानंतर, शस्त्रे आणि दारूगोळा यांची कशी वाहतूक केली जावी याबाबत स्पष्टता नसल्याने खेळाडूंना वेळेत विमानात चढता आले नाही. सातपैकी केवळ एकच खेळाडू विमानात प्रवेश करु शकला पण, त्याला शूटींग किट विमानतळावर ठेवावे लागल्याने त्यालाही स्पर्धेत कादचित सहभागी होता येणार नाही, अशी भीती व्यक्त केली जात आहे.

खेळाडू मुलांसोबत त्यांचे पालक देखील विमानतळावर यावेळी हजर होते. विमान प्रवासासाठी आवश्यक सर्व कागदपत्र प्रक्रिया पूर्ण केली असून, विमानतळावर देखीव विविध अर्ज भरल्याची माहिती पालकांनी दिली. शस्त्रे वाहतुकीबाबत सर्व नियमांचे पालन केले होते, असेही खेळाडुंचे पालक म्हणाले.

"अकासा एअरचे कर्माचारी खूप उद्धट वागले, त्यांनी तपासणीत विलंब केला आणि कोणत्याही प्रकारचे सहकार्य केले नाही", असा आरोप या खेळाडुंनी आरोप केला.

अकासा कंपनीने याबाबत स्पष्टीकरण दिले आहे. सुरक्षा तपासणीत विलंब झाल्याने नेमबाजांची टीम विमानात वेळेत प्रवेश करु शकले नाहीत. गोव्यातील स्पर्धेला जाण्यासाठी आमचा ग्राऊंड स्टाफ खेळाडुंना आवश्यक ती मदत करत आहे, अशी माहिती अकासाने दिली आहे.