उगाच बारामती, बारामती करू नका ; अजित पवारांनी राष्ट्रवादीच्याच आमदाराला सुनावले

पुणे: चाकण येथील एका उद्घाटनाच्या कार्यक्रमात बोलताना उपमुख्यमंत्री अजित पवार यांनी राष्ट्रवादी कॉंग्रेसच्याच आमदाराला खडे बोल सुनावले. आमदार दिलीप मोहिते पाटीलांनी चाकण परिसरात विमानतळ व्हावे, अशी इच्छा दर्शवली होती. त्यांच्या मते, विमानतळ झाले असते तर चाकण एमआयडीसी मध्ये आलिशान हॉटेल्स असते, पण, ते विमानतळ आता बारामतीला गेले." (Ajit Pawar taunts NCP MLA in Khed Pune)

यावरूनच अजित पवार यांनी आमदार दिलीप मोहिते पाटील यांना खडे बोल सुनावले. ते म्हणाले, "विमानतळ हे काय खेळण्यातील नाही की अजून एक द्या असे म्हणायला, त्याचा सर्व्हे करायला लागतो, उगाच बारामती, बारामती करू नका. विमानतळ बारामतीला नेले जाणार नाही," असे अजित पवार यांनी स्पष्ट केले.

राष्ट्रवादी पक्षाचे खेडचे आमदार दिलीप मोहिते पाटील आपल्या भाषणात म्हणाले होते की, आपल्याकडील काही नेत्यांनी विरोध करायला नको होता. विमानतळ झाले असते तर खेडचा चेहरा मोहरा बदलला असता. आता ते विमानतळ बारामतीला होणार आहे. विमानतळ झाले असते तर आणखी विकास झाला असता, अनेकांनी हॉटेल्ससाठी जागा घेतल्या होत्या. अजित पवार यांना विनंती आहे की, आंतरराष्ट्रीय विमानतळ हे बारामतीला गेले त्याचा आनंद आहे. निदान डोमॅस्टिक विमानतळ इथे व्हावे.