अनिल देशमुख, प्रताप सरनाईक यांच्यानंतर ईडीचा मोर्चा एकनाथ खडसेंकडे

मुंबई: भोसरीतील जमीन घोटाळा प्रकरणी एकनाथ खडसे (Eknath Khadse) यांचे जावई गिरीश चौधरी यांना काल ईडीने (Ed) अटक केली आहे. गिरीश चौधरी यांच्या अटकेमुळे खडसेंना हा मोठा धक्का मानला जात आहे.

युती सरकारच्या काळात खडसे यांना भोसरी जमीन घोटाळ्याप्रकरणी आपले मंत्रीपद गमवावे लागले होते. त्यानंतर खडसे आणि त्यांची मुलगी शारदा यांना ईडीने चौकशीसाठी बोलाविले होते.

त्यानंतर त्यांचे जावई गिरीश चौधरी यांना देखील चौकशीसाठी बोलावले होते. मंगळावारी दिवसभर त्यांची चौकशी करण्यात आली आणि त्यानंतर त्यांना रात्री अटक करण्यात आली आहे. चौधरी यांच्या अटकेमुळे भाजपची साथ सोडून राष्ट्रवादी सोबत गेलेले एकनाथ खडसे यांना झटका बसला आहे.

गेले काही दिवस महाविकास आघाडीच्या मागे ईडीचे वादळ घोंगावत आहे. कधी माहाविकास आघाडीतील नेते तर कधी त्यांचे नातेवाईक यांच्या मागे हा ईडीचा ससेमीरा लावला जात आहे. अनिल देशमुख (Anil Deshmukh) , प्रताप सरनाईक (Pratap Saranaik) आणि आता एकनाथ खडसे यांच्याकडे ईडीचा मोर्चा वळाला आहे.