WPL 2023 Auction: सोमवारी (13 फेब्रुवारी) वूमन्स प्रीमियर लीगच्या (WPL) पहिल्या हंगामाचा लिलाव मुंबईत पार पडला. या लिलावात पहिलेच नाव भारतीय संघाची उपकर्णधार स्मृती मानधनाचे आले. तिच्यासाठी अपेक्षेप्रमाणे मोठी मागणी झाली.
तिच्यासाठी सुरुवातीला मुंबई इंडियन्स आणि रॉयल चॅलेंजर्स बेंगलोर यांच्याच चूरस सुरू होती. या दोन्ही संघांमध्ये तिची किंमत ३ कोटींचा टप्पा पार झाला तरी चढाओढ पाहायला मिळाली. पण अखेर बेंगलोरने 3 कोटी 40 लाखांची बोली मानधनासाठी लावत तिला संघात घेतले. मानधनाची मुळ किंमत 50 लाख रुपये होती.
मानधनाला बऱ्याच वर्षांचा अनुभव आहे. तसेच ती संघाच्या कर्णधारपदासाठीही चांगला पर्याय ठरू शकते. ती सध्याची भारतीय संघातील सर्वात अनुभवी खेळाडूंपैकी एक आहे. त्यामुळे तिच्यावर डब्ल्यूपीएल लिलावात मोठी बोली लागण्याचे अंदाज अनेक तज्ञांनी व्यक्त केले होते. हे अंदाज आता खरे ठरले असून तिचा या लिलावातील सर्वात महागड्या खेळाडूंमध्ये समावेश झाला आहे.
मानधना यापूर्वी परदेशी टी20 लीगमध्येही खेळली असल्याने तिचा अनुभव संघासाठी महत्त्वाची ठरणार आहे. ती परदेशी लीग खेळणाऱ्या सुरुवातीच्या भारतीय खेळाडूंपैकी एक होती. तिने आत्तापर्यंत द हंड्रेडमध्ये साऊदर्न ब्रेव्ह संघाचे, किया सुपर लीगमध्ये वेस्टर्न स्ट्रोम संघाचे, तसेच बिग बॅश लीगमध्ये सिडनी थंडर्स आणि ब्रिस्बेन हिट या महिला संघांचे प्रतिनिधित्व केले आहे.
तिने आत्तापर्यंत 112 आंतरराष्ट्रीय टी20 सामने खेळले असून 20 अर्धशकांसह तिने 2651 धावा केल्या आहेत.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.