Rishabh Pant: 'नॉट बॅड ऋषभ!', मदतीशिवाय पंतने चढल्या पायऱ्या, Video पाहून चाहतेही सुखावले

Rishabh Pant video of climbing stairs without support: भारतीय क्रिकेट संघाने कसोटी चॅम्पियशीप 2021-23 स्पर्धेच्या अंतिम सामन्यात काही दिवसांपूर्वीच ऑस्ट्रेलिया विरुद्ध 209 धावांनी पराभव स्विकारला. त्यामुळे या स्पर्धेत सलग दुसऱ्यांदा भारताला उपविजेतेपदावर समाधान मानावे लागले.

दरम्यान, या सामन्यात अनेकांना यष्टीरक्षक फलंदाज ऋषभ पंतची आठवण झाली. अनेक चाहत्यांनी असेही म्हटले की भारतीय संघाल पंतची कमी जाणवली. पंत गेल्या वर्षांच्या अखेरीस गंभीर कार अपघातात झालेल्या दुखापतींमधून सावरत आहे.

पण तो या दुखापतीतून चांगल्या प्रकारे सावरत असल्याचेच दिसून आले आहे. त्याने नुकताच एक व्हिडिओ सोशल मीडियावर शेअर केला आहे, हा व्हिडिओ पाहून अनेक भारतीय क्रिकेट चाहत्यांना आनंद झाला आहे. कारण या व्हिडिओमध्ये पंत कोणत्याही मदतीशिवाय पायऱ्या चढताना दिसत आहे.

या व्हिडिओमध्ये आधी पंत आधार घेत पायऱ्या चढताना दिसत आहे. त्यावेळी त्याला त्रासही होताना दिसत आहे. पण त्यानंतर तो कोणत्याही आधाराशिवाय सहज पायऱ्या चढताना दिसत आहे. यातून त्याने त्याच्या तंदुरुस्तीत झालेला फरक दर्शवला आहे. त्यामुळे आता ललकरच तो पूर्ण तंदुरुस्त होईल अशी अपेक्षा चाहत्यांनी बाळगली आहे.

पंतचा डिसेंबर 2022 अखेरीस दिल्लीवरून रुडकीला येताना गंभीर कार अपघात झाला होता. या अपघातात त्याला काही गंभीर जखमाही झाल्या. तसेच त्याची कार पूर्ण जळाली होती. पण सुदैवाने तो या गंभीर कार अपघातातून बचावला.

याच अपघातानंतर त्याच्या गुडघ्यावर शस्त्रक्रियाही करण्यात आली होती. त्याचमुळे त्याला गेल्या 6 महिन्यांपासून क्रिकेटमधून दूर रहावे लागले आहे.

पंतची आंतरराष्ट्रीय कारकिर्द

पंतने आत्तापर्यंत त्यांच्या कारकिर्दीत 33 कसोटी सामने खेळले आहेत. यामध्ये त्याने 43.67 च्या सरासरीने आणि 5 शतकांसह 2271 धावा केल्या आहेत. तसेच त्याने 30 वनडे सामन्यांमध्ये 34.60 च्या सरासरीने 1 शतक आणि 5 अर्धशतकांसह 865 धावा केल्या आहेत.

त्याचबरोबर त्याने 66 आंतरराष्ट्रीय टी20 सामन्यांमध्ये 3 अर्धशतकांसह 987 धावा केल्या आहेत. याशिवाय त्याने यष्टीरक्षण करताना 129 आंतरराष्ट्रीय सामन्यांमध्ये 190 विकेट्स घेतल्या. यात 166 झेलांचा आणि 24 यष्टीचीतचा समावेश आहे.