Kuldeep Yadav and Ravindra Jadeja pair Record: वेस्ट इंडिज विरुद्ध भारत संघात गुरुवारी (27 जुलै) 3 सामन्यांच्या वनडे मालिकेतील पहिला सामना बार्बाडोसला पार पडला. या सामन्यात भारताने 5 विकेट्सने विजय मिळवला. भारताच्या या विजयात कुलदीप यादव आणि रविंद्र जडेजा यांनी गोलंदाजी करताना महत्त्वाची कामगिरी बजावली.
या सामन्कुलदीपने 3 षटके गोलंदाजी करताना केवळ 6 धावा देत 4 विकेट्स घेतल्या, तर जडेजाने 6 षटकांमध्ये 37 धावा खर्च करत 3 विकेट्स घेतल्या. या दोघांच्या गोलंदाजीच्या जोरावर भारताने वेस्ट इंडिजचा डाव 23 षटकातच 114 धावांवर संपुष्टात आणला.
दरम्यान, कुलदीप आणि जडेजा हे दोघेही डावखुरे फिरकीपटू आहेत. त्यामुळे त्यांच्या नावावर मोठा विक्रम नोंदवला गेला. भारतीय डावखुरे फिरकीपटू म्हणून एकत्र एका वनडे सामन्यात 7 किंवा त्यापेक्षा अधिक विकेट्स घेणारी त्यांची पहिलीच जोडी ठरली. यापूर्वी भारताच्या डावखुऱ्या फिरकीपटूंना एकत्र एकाच वनडेत 7 विकेट्स घेता आल्या नव्हत्या.
सामन्याबद्दल सांगायचे झाल्यास, कुलदीप आणि जडेजाव्यतिरिक्त हार्दिक पंड्या, मुकेश कुमार आणि शार्दुल ठाकूर यांनी प्रत्येकी 1 विकेट घेतली. वेस्ट इंडिजकडून कर्णधार शाय होपने सर्वाधिक 43 धावांची खेळी केली. तसेच ऍलिक अथानाझने 22 धावांची खेळी केली. या दोघांव्यतिरिक्त वेस्ट इंडिजकडून कोणीही 20 धावांचा टप्पा ओलांडला नाही.
त्यानंतर 115 धावांच्या आव्हानाचा पाठलाग करताना भारताने फलंदाजी क्रमवारीत अनेक बदल केले होते. पण भारताने इशान किशनने केलेल्या अर्धशतकी खेळीच्या जोरावर विजयाला गवसणी घातली. इशानने सलामीला फलंदाजी करताना 46 चेंडूत 52 धावांची खेळी केली.
तसेच सूर्यकुमार यादवने 19, रविंद्र जडेजाने नाबाद 16 आणि रोहित शर्माने नाबाद 12 धावा केल्या. याशिवाय शुभमन गिल (7), हार्दिक पंड्या (5) आणि शार्दुल ठाकूर (1) स्वस्तात बाद झाले.
वेस्ट इंडिजकडून गुडाकेश मोतीने 2 विकेट्स घेतल्या, तर जेडेन सील्स आणि यानिक कॅरिया यांनी प्रत्येकी 1 विकेट घेतली.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.