IND vs AFG: चेस मास्टर! विराटची 29 धावांची खेळीही ठरली विक्रमी, 'हा' रेकॉर्ड करणारा पहिलाच भारतीय

India vs Afghanistan, 2nd T20I match at Indore, Virat Kohli Record:

भारत विरुद्ध अफगाणिस्तान संघात रविवारी टी20 मालिकेतील दुसरा सामना इंदूरच्या होळकर क्रिकेट स्टेडियमवर पार पडला. या सामन्यात भारतीय संघाने 6 विकेट्सने विजय मिळवला. या विजयासह भारतीय संघाने तीन सामन्यांच्या टी20 मालिकेत 2-0 अशी विजयी आघाडी घेतली आहे.

याच सामन्यात भारताचा स्टार फलंदाज विराट कोहलीने एका मोठ्या विक्रमाला गवसणी घातली आहे.

विशेष म्हणजे विराटने या सामन्यातून 14 महिन्यांनंतर आंतरराष्ट्रीय टी20 क्रिकेटमध्ये पुनरागमन केले. यापूर्वी त्याने भारताकडून अखेरचा टी20 सामना नोव्हेंबर 2022 मध्ये खेळला होता. विराटने 14 महिन्यांनी आंतरराष्ट्रीय टी20 क्रिकेटमध्ये पुनरागमन करताना भारताच्या विजयात खारीचा वाटाही उचलला.

रविवारी झालेल्या सामन्यात अफगाणिस्तानने भारतासमोर 173 धावांचे आव्हान ठेवले होते. या आव्हानाचा पाठलाग करताना भारताने पहिल्याच षटकात रोहित शर्माची विकेट गमावली. त्यामुळे विराटला पहिल्याच षटकात मैदानात उतरावे लागले होते.

त्याने सलामीवीर यशस्वी जयस्वालची चांगली साथ देताना दुसऱ्या विकेटसाठी 57 धावांची भागीदारी केली. ही भागीदारी विराट बाद झाल्यानेच तुटली. विराटने 16 चेंडूत 5 चौकारांसह 29 धावांची खेळी केली.

विराटचा विक्रम

विराटने ही 29 धावांची खेळी करण्याबरोबर आंतरराष्ट्रीय टी20 क्रिकेटमध्ये लक्ष्याचा पाठलाग करताना 2000 धावांचा टप्पा पूर्ण केला आहे. तो लक्ष्याचा पाठलाग करताना 2000 आंतरराष्ट्रीय टी20 धावा करणारा जगातील दुसराच, तर भारताचा पहिला क्रिकेटपटू आहे.

विराटपूर्वी केवळ आयर्लंडच्या पॉल स्टर्लिंगने आंतरराष्ट्रीय टी20 क्रिकेटमध्ये लक्ष्याचा पाठलाग करताना 2000 धावांचा टप्पा पूर्ण केला आहे. स्टर्लिंगने आत्तापर्यंत 84 आंतरराष्ट्रीय टी20 सामन्यात लक्ष्याचा पाठलाग करताना 2074 धावा केल्या आहेत. तसेच विराटने आत्तापर्यंत 52 आंतरराष्ट्रीय टी20 क्रिकेटमध्ये लक्ष्याचा पाठलाग केला असून २०१२ धावा केल्या आहेत.

आंतरराष्ट्रीय टी20 क्रिकेटमध्ये लक्ष्याचा पाठलाग करताना सर्वाधिक धावा करणारे क्रिकेटपटू

• 2074 - पॉल स्टर्लिंग (84 सामने)

• 2012 - विराट कोहली (52 सामने)

• 1788 - डेव्हिड वॉर्नर (61 सामने)

• 1628 - बाबर आझम (53 सामने)

• 1465 - रोहित शर्मा (71 सामने)

भारताचा विजय

दरम्यान, रविवारी विराट बाद झाल्यानंतर जयस्वाल आणि शिवम दुबे यांनी आक्रमक खेळत अर्धशतके पूर्ण केली. या सामन्यात दुबेने 32 चेंडूत 63 धावांची नाबाद खेळी केली. तसेच यशस्वी जयस्वालने 34 चेंडूत 68 धावांची खेळी केली. त्यामुळे भारताने 15.4 षटकात सहज 173 धावांच्या लक्ष्याचा यशस्वी पाठलाग करत विजय मिळवला.