Virat Kohli: 2024 मध्ये किंग कोहलीच्या निशाण्यावर 'हे' 5 रेकॉर्ड; सचिन तेंडुलकरचे आणखी तीन रेकॉर्ड धोक्यात!

Virat Kohli: भारताचा स्टार क्रिकेटर विराट कोहलीसाठी 2023 हे वर्ष संस्मरणीय ठरले. त्याने अनेक विक्रम केले आणि मोडले. गेल्या वर्षी आंतरराष्ट्रीय स्तरावर सर्वाधिक धावा करणारा तो दुसऱ्या क्रमांकावर होता. त्याने 35 सामन्यांमध्ये 8 शतके आणि 10 अर्धशतकांच्या मदतीने 2048 धावा केल्या. त्याने महान फलंदाज सचिन तेंडुलकरला मागे सोडले आणि सर्वाधिक 50 वनडे शतकांचा विक्रम केला.

एकदिवसीय विश्वचषकात तो प्लेअर ऑफ द टूर्नामेंट होता. मात्र, 2024 मध्येही अनेक विक्रम कोहलीच्या निशाण्यावर असतील. आम्ही तुम्हाला त्या 5 आश्चर्यकारक विक्रमांबद्दल सांगणार आहोत, जे कोहली या वर्षात मोडू शकतो.

1 - कोहली वनडेत सर्वात जलद 14000 धावा पूर्ण करण्याच्या उंबरठ्यावर आहे. त्याला हा टप्पा गाठण्यासाठी 152 धावांची गरज आहे. त्याने 292 सामन्यात 13848 धावा केल्या आहेत. सध्या हा विक्रम सचिनच्या नावावर आहे, ज्याने 350 सामन्यांमध्ये ही कामगिरी केली होती.

2 - कोहलीला सर्व फॉरमॅटमध्ये इंग्लंडविरुद्ध भारताचा सर्वाधिक धावा करणारा खेळाडू बनण्यासाठी 21 धावांची गरज आहे. कोहली इंग्लंडविरुद्ध 4000 आंतरराष्ट्रीय धावा करणारा पहिला भारतीय फलंदाज होण्यापासून फक्त 30 धावा दूर आहे. भारत आणि इंग्लंड यांच्यात जानेवारी ते मार्च या कालावधीत पाच कसोटी सामन्यांची मालिका खेळवली जाणार आहे.

3 – विराट कोहलीला T20 क्रिकेटमध्ये 12000 धावा करणारा पहिला भारतीय होण्यासाठी फक्त 35 धावांची गरज आहे. T20 क्रिकेटमध्ये सर्वाधिक धावा करणाऱ्या खेळाडूंच्या यादीत तो चौथ्या क्रमांकावर आहे. त्याच्या पुढे वेस्ट इंडिजचा ख्रिस गेल, पाकिस्तानचा शोएब मलिक आणि वेस्ट इंडिजचा केरॉन पोलार्ड आहेत.

4 - मायदेशात सर्वाधिक आंतरराष्ट्रीय शतके करणारा फलंदाज होण्यासाठी कोहलीला 5 शतकांची गरज आहे. हा विक्रम सध्या सचिन तेंडुलकरच्या नावावर आहे. त्याने 24 वर्षांच्या कारकिर्दीत घरच्या मैदानावर 42 शतके झळकावली आहेत.

5- कोहली न्यूझीलंडविरुद्ध सर्वाधिक आंतरराष्ट्रीय शतके झळकावणारा भारतीय खेळाडू होण्याच्या मार्गावर आहे. ही कामगिरी करण्यासाठी त्याला शतकाची गरज आहे. कोहली आणि सचिन यांच्या नावे प्रत्येकी 9 शतके आहेत.