वास्कोच्या विजयात बीव्हनची छाप; प्रोफेशनल लीग फुटबॉलमध्ये कळंगुट असोसिएशनवर मात

पणजी: बीव्हन डिमेलोने (Bevan Dimelo) वास्को स्पोर्टस क्लब (Vasco Sports Club) संघातील पदार्पण उल्लेखनीय ठरविताना शनिवारी गोवा प्रोफेशनल लीग फुटबॉल (Goa Professional League Football) स्पर्धेत शानदार खेळ केला. वास्कोने म्हापसा येथील धुळेर स्टेडियमवर कळंगुट असोसिएशनला (Calangute Association) 2-0 फरकाने हरविले. धेंपो स्पोर्टस क्लबचा माजी आघाडीपटू बीव्हनने प्रोफेशनल लीग स्पर्धेच्या एका महिन्याच्या खंडात वास्को क्लबशी करार केला. नवी जबाबदारी पेलताना बीव्हनने 43 व्या मिनिटास वास्को क्लबला आघाडी मिळवून दिली. नंतर सामन्याच्या भरपाई वेळेत सॅव्हलॉन फर्नांडिसने वास्को क्लबच्या विजयावर शिक्कामोर्तब केले. सामन्यात एक खेळाडू कमी होऊनही वास्को क्लबने विजय निसटू दिला नाही. त्यांच्या अमित दास याला रेड कार्ड मिळाले.

विश्रांतीला दोन मिनिटे बाकी असताना वास्को क्लबला फ्रीकिक फटका मिळाला. करणच्या फटक्यावर बीव्हनने सेटपिसेस व्यूहरचना यशस्वी ठरविताना अचूक हेडिंग साधत संघाला आघाडीवर नेले. पूर्वार्धात कळंगुट असोसिएशनचे सामन्यावर वर्चस्व होते, मात्र गोल करण्याचा मान वास्कोने मिळविला. भरपाई वेळेत बीव्हनच्या असिस्टवर सॅव्हलॉनने गोलरक्षकाला चकवा देत वास्को क्लबचे पूर्ण तीन गुण निश्चित केले.