Vinoo Mankad Trophy: गोव्याच्या मुलांची विजयी सलामी; अरुणाचल प्रदेशला सहजपणे नमविले

Vinoo Mankad Trophy: गोव्याच्या 19 वर्षांखालील मुलांच्या क्रिकेट संघाने गुरुवारी विनू मांकड करंडक एकदिवसीय सामन्यांच्या क्रिकेट स्पर्धेत शानदार विजयी सलामी देताना कमजोर अरुणाचल प्रदेशवर 124 धावांनी दणदणीत विजय नोंदविला. ‘ड’ गटातील सामना पुदुचेरी येथे झाला.

गोव्याने नाणेफेक जिंकून प्रथम फलंदाजी करण्याचा निर्णय घेतला. त्यांनी निर्धारित ५० षटकांत ५ बाद २५८ धावा केल्या. शानदार अर्धशतके नोंदवलेल्या शंतनू नेवगी व मल्हार नाईक यांनी दुसऱ्या विकेटसाठी ८५ धावांची भागीदारी केली.

त्यामुळे वीर यादव याला लवकर गमावल्यानंतर गोव्याला सावरता आले. शंतनू याने ६९ चेंडूंत पाच चौकार व दोन षटकारांच्या मदतीने ६१, तर मल्हारने ७४ चेंडूंत सात चौकारांसह ५२ धावा नोंदविल्या.

नंतर यश कसवणकर (३८), दिशांक मिस्कीन (४५ चेंडूंत नाबाद ३२), जीवनकुमार चित्तेम (२४) यांचे योगदानही डावात महत्त्वपूर्ण ठरले. दिशांक व जीवनकुमार यांनी पाचव्या विकेटसाठी ५७ धावांची भागीदारी केल्यामुळे गोव्याने अडीचशे धावांचा टप्पा ओलांडला.

उत्तरादाखल अरुणाचल प्रदेशचा डाव ४४.१ षटकांत १३४ धावांत आटोपला. मध्यमगती युवराज सिंग याने शानदार मारा करताना ३२ धावांत ४ गडी टिपले.

त्याला चांगली साथ देताना स्वप्नील गावकर व शिवांक देसाई यांनी प्रत्येकी २ विकेट मिळविल्या. गोव्याचा स्पर्धेतील पुढील सामना शनिवारी (ता. १४) सौराष्ट्रविरुद्ध होईल.

संक्षिप्त धावफलक

गोवा : ५० षटकांत ५ बाद २५८ (वीर यादव १५, शंतनू नेवगी ६१, मल्हार नाईक ५२, यश कसवणकर ३८, दिशांक मिस्कीन नाबाद ४२, जीवनकुमार चित्तेम २४, हर्ष २-३९, भार्गव २-२७) वि.

वि. अरुणाचल प्रदेश : ४४.१ षटकांत सर्वबाद १३४ (आकाश १७, रेबी २४, दुष्यंत ४७, पुंडलिक नाईक ७.१-०-१९-१, युवराज सिंग १०-१-३२-४, स्वप्नील गावकर ९-४-२१-२, शिवांक देसाई ६-२-२०-२, मल्हार नाईक ६-०-२५-०, यश कसवणकर ६-१-१५-१).