U-15 Cricket Tournament: 'शिवाजी पार्क'ने विजय आयसीई'ला नमवले

पणजी: मुंबईच्या शिवाजी पार्क जिमखाना संघाने अखिल भारतीय भिकू पै आंगले करंडक 15 वर्षांखालील क्रिकेट स्पर्धेत विजेतेपद मिळविले. शनिवारी झालेल्या अंतिम लढतीत त्यांनी विजय आयसीई संघावर आठ विकेट राखून मात केली. सामना मडगाव येथील केआरसी मैदानावर झाला.

(U-15 Cricket Tournament Shivaji Park Gymkhana team win)

विजय आयसीई संघाने प्रथम फलंदाजी करताना 43.3 षटकांत सर्वबाद 145 धावा केल्या. त्यांच्या आरव याने 49, तर अंकित राम याने 22 धावा केल्या. शिवाजी पार्कच्या धीर शाह याने 15 धावांत 3, अथर्व अधिकारीने 29 धावांत 3, वेदांत देसाईने 39 धावांत 3 गडी बाद केले. रझा मिर्झा याच्या नाबाद 72 धावा, तसेच मीत पटेल (29) व सोहम साळी (24) यांच्या योगदानाच्या बळावर शिवाजी पार्क संघाने 28.3 षटकांत 2 बाद 146 धावा करून विजेतेपद प्राप्त केले.

गोवा क्रिकेट असोसिएशनचे अध्यक्ष विपुल फडके, सचिव रोहन देसाई, कोकण रेल्वेचे वरिष्ठ अभियंता जी. शशिधर, माशे क्रिकेट क्लबचे अध्यक्ष सुरेंद्र नाईक, मडगाव क्रिकेट अकादमीचे सचिव शौमिक पै आंगले यांच्या उपस्थितीत बक्षीस वितरण झाले.

शिवाजी पार्कचा धीर शाह (अंतिम सामन्याचा मानकरी), विजय संघाचा अंकित राम (स्पर्धेचा मानकरी), शिवाजी पार्कचा रझा मिर्झा (उत्कृष्ट फलंदाज), विजय संघाचा सुजल साहानी (उत्कृष्ट गोलंदाज) यांना वैयक्तिक बक्षिसे देण्यात आली.