T20 World Cup 2026: "निष्काळजीपणा महागात पडेल..." सनी पाजींकडून टीम इंडियाला धोक्याचा इशारा, फलंदाजांवर ओढले ताशेरे

टी-२० विश्वचषक २०२६ मध्ये भारतीय संघाने अमेरिकेवर विजय मिळवत आपल्या मोहिमेची दिमाखात सुरुवात केली असली, तरी माजी दिग्गज क्रिकेटपटू सुनील गावस्कर यांनी मात्र भारतीय फलंदाजांच्या बेजबाबदार खेळीवर तीव्र नाराजी व्यक्त केली आहे. "विजयाचा आनंद असला तरी फलंदाजांची ही निष्काळजी वृत्ती आगामी सामन्यांमध्ये महागात पडू शकते," असा धोक्याचा इशारा गावस्कर यांनी दिला आहे.

सूर्याने वाचवली लाज

अमेरिकेविरुद्धच्या सामन्यात भारतीय फलंदाजीची सुरुवात अत्यंत खराब झाली होती. अवघ्या ७७ धावांत भारताने आपले ६ प्रमुख फलंदाज गमावले होते. सलामीवीर अभिषेक शर्मा आणि शिवम दुबे भोपळाही न फोडता तंबूत परतले.

इशान किशन, रिंकू सिंह आणि हार्दिक पांड्या यांच्याकडून मोठ्या अपेक्षा होत्या, मात्र ते देखील ठराविक अंतराने बाद झाले. जर कर्णधार सूर्यकुमार यादवने ४९ चेंडूत ८४ धावांची स्फोटक खेळी केली नसती, तर भारताला या स्पर्धेच्या सुरुवातीलाच मोठ्या नामुष्कीला सामोरे जावे लागले असते.

गावस्करांचा फलंदाजांना 'घरचा आहेर'

एका वृत्तवाहिनीशी संवाद साधताना सुनील गावस्कर म्हणाले, "१६० धावांचे आव्हान सोपे नव्हते, पण आपण ३० धावांनी जिंकलो ही चांगली गोष्ट आहे. मात्र, या विजयापेक्षा आपण केलेल्या चुकांमधून शिकणे जास्त गरजेचे आहे. तुमच्याकडे आठव्या क्रमांकापर्यंत फलंदाजीची खोली आहे, हे मान्य आहे. पण याचा अर्थ असा नाही की, सुरुवातीच्या ७-८ षटकांतच तुमचे ४-५ फलंदाज बाद व्हावेत. जर समोर एखादा अनुभवी आणि बलाढ्य संघ असता, तर भारताला हे पान उलटवणे कठीण गेले असते."

गावस्कर यांनी पुढे स्पष्ट केले की, पॉवरप्लेचा अर्थ फक्त फटकेबाजी करणे असा नसून, विकेट टिकवून धावगती राखणे हा असतो. "पॉवरप्लेमध्ये सहा षटकात तुम्ही ४ विकेट गमावत असाल, तर तुम्ही स्वतःहून स्वतःला अडचणीत ढकलत आहात. विश्वचषकासारख्या मोठ्या व्यासपीठावर प्रत्येक संघ आपला सर्वोत्तम खेळ करतो, तिथे अशा चुकांना माफी नसते," असे कडक शब्द गावस्कर यांनी वापरले. भारताचा पुढील प्रवास सोपा व्हावा, यासाठी फलंदाजांनी आपल्या मानसिकतेत बदल करणे आवश्यक असल्याचे त्यांनी आवर्जून सांगितले.