Stuart Broad: ऍशेस मालिका संपल्यानंतर आता इंग्लंडचा स्टार गोलंदाज स्टुअर्ट ब्रॉडची आंतरराष्ट्रीय क्रिकेट कारकीर्दही संपली आहे.
ऍशेस मालिकेतील शेवटची कसोटी हा त्याच्या आंतरराष्ट्रीय कारकिर्दीतील शेवटचा सामना होता, ज्याची घोषणा त्याने सामन्याच्या चौथ्या दिवशी केली होती. दरम्यान ब्रॉडने असा विश्वविक्रम आपल्या नावावर केला, जो शतकानुशतके स्मरणात राहील.
खरे तर, ऑस्ट्रेलियाविरुद्धच्या (Australia) मालिकेतील पाचव्या सामन्यात स्टुअर्ट ब्रॉडने फलंदाजीत शेवटच्या चेंडूवर षटकार मारला तर गोलंदाजीत शेवटच्या चेंडूवर विकेट घेतली.
या पराक्रमाच्या जोरावर कसोटी कारकिर्दीतील शेवटच्या चेंडूवर षटकार आणि शेवटच्या चेंडूवर विकेट घेणारा तो एकमेव खेळाडू ठरला आहे. ब्रॉडच्या आधी कसोटी क्रिकेटच्या इतिहासात असा पराक्रम इतर कोणत्याही खेळाडूला करता आलेला नाही.
दरम्यान, स्टुअर्ट ब्रॉडने (Stuart Broad) ऍशेस मालिकेत शानदार गोलंदाजी केली. मिचेल स्टार्कनंतर या मालिकेत सर्वाधिक विकेट घेणारा तो दुसरा गोलंदाज ठरला. मालिकेत ब्रॉडने 22 विकेट घेतल्या.
त्याची इकॉनॉमी 3.39 होती. 65 धावांत 4 बळी ही त्याची सर्वोत्तम कामगिरी होती. ब्रॉडने ऑस्ट्रेलियाविरुद्ध 5 कसोटी सामन्यांच्या 10 डावात 22 विकेट्स घेतल्या. या मालिकेत तो इंग्लंडकडून सर्वाधिक बळी घेणारा गोलंदाज ठरला आहे.
स्टुअर्ट ब्रॉडने कसोटी क्रिकेटमध्ये इंग्लंडकडून 167 सामने खेळले. यादरम्यान त्याने 604 विकेट घेतल्या आहेत. 20 वेळा कसोटीत 5 विकेट घेणारा तो एकमेव गोलंदाज आहे.
एका कसोटीत तीन वेळा 10 बळी घेण्याचा पराक्रमही ब्रॉडने केला आहे. ब्रॉडने फलंदाजीतही कमाल केली. त्याने 244 डावात 3662 धावा केल्या आहेत. त्याने 13 अर्धशतके आणि एक शतकही झळकावले आहे.
ऍशेस मालिकेतील शेवटचा कसोटी सामना यजमान इंग्लंडने 49 धावांनी जिंकला. इंग्लंड आणि ऑस्ट्रेलिया यांच्यात खेळल्या गेलेल्या 5 कसोटी सामन्यांची ही मालिका 2-2 अशी बरोबरीत सुटली. पहिले 2 सामने ऑस्ट्रेलियाने जिंकले, तर तिसऱ्या कसोटीत इंग्लंडने शानदार पुनरागमन करत विजय मिळवला होता. मात्र, चौथी कसोटी अनिर्णित राहिली.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.