Shashi Tharoor Tweet Viral: नागपूरच्या विदर्भ क्रिकेट असोसिएशन मैदानावर भारत आणि न्यूझीलंड यांच्यात रंगलेला पहिला टी-20 सामना केवळ भारतीय संघाच्या विजयामुळेच नाही, तर एका खास पाहुण्यांच्या उपस्थितीमुळेही चर्चेत आला आहे. काँग्रेस पक्षाचे ज्येष्ठ नेते आणि खासदार शशी थरुर यांनी बुधवारी (21 जानेवारी) प्रत्यक्ष स्टेडियममध्ये बसून या सामन्याचा थरार अनुभवला.
भारतीय संघाने 48 धावांनी मिळवलेला दणदणीत विजय आणि नागपूरकर चाहत्यांचा उत्साह यावर थरुर यांनी आपल्या खास शैलीत केलेले ट्विट सध्या सोशल मीडियावर तुफान व्हायरल होत आहे. या ट्विटच्या माध्यमातून त्यांनी प्रेक्षकांमध्ये बसून सामना पाहण्याचा आपला अनुभव अत्यंत रंजक पद्धतीने मांडला आहे.
नेहमीच आपल्या शब्दसंपदेमुळे आणि अनोख्या ट्विट्समुळे चर्चेत राहणाऱ्या शशी थरुर (Shashi Tharoor) यांनी नागपूर दौऱ्याचा समारोप या क्रिकेट सामन्याने केला. थरुर यांनी त्यांच्या ट्विटमध्ये नमूद केले की, त्यांनी हा सामना कोणत्याही 'एअर-कंडीशन्ड' (AC) बॉक्समध्ये बसून पाहिला नाही. व्हीआयपी लोकांसाठी राखीव असलेल्या आणि सर्वसामान्य प्रेक्षकांच्या कोलाहलापासून दूर असलेल्या वातानुकूलित केबिनमध्ये बसण्यापेक्षा, त्यांनी मैदानातील 45000 प्रेक्षकांच्या जल्लोषात सहभागी होणे पसंत केले. प्रेक्षकांचा तो जोश आणि आरडाओरडा अनुभवापासून स्वत:ला दूर ठेवण्याची त्यांची इच्छा नव्हती, म्हणूनच त्यांनी सामान्य प्रेक्षक गॅलरीत बसून सामन्याचा आनंद लुटला.
थरुर यांनी आपल्या ट्विटमध्ये एक अत्यंत मजेशीर वक्तव्य केले, ज्याची सध्या सर्वाधिक चर्चा होत आहे. त्यांनी लिहिले की, "आज रात्री न्यूझीलंडच्या संघाने जेवढ्या धावा केल्या नाहीत, त्यापेक्षा जास्त सेल्फी मला नागपूरच्या चाहत्यांना द्याव्या लागल्या." या एका वाक्यातून त्यांनी नागपूरच्या क्रिकेटप्रेमींनी त्यांच्यावर केलेल्या प्रेमाचा आणि प्रतिसादाचा उल्लेख केला. सामन्यादरम्यान अनेक चाहते त्यांच्यासोबत फोटो काढण्यासाठी गर्दी करत होते. तरीही, त्यांनी या सेल्फीचा कंटाळा न करता सामना आणि भारताचा विजय या दोन्ही गोष्टींचा पुरेपूर आनंद घेतल्याचे सांगितले.
भारत (India) आणि न्यूझीलंडमधील या पाच सामन्यांच्या मालिकेची सुरुवात नागपुरातून झाली असून भारताने 1-0 अशी आघाडी घेतली आहे. भारतीय खेळाडूंच्या शानदार कामगिरीसोबतच शशी थरुर यांच्यासारख्या लोकप्रतिनिधीने प्रेक्षकांमध्ये मिसळून घेतलेला हा आनंद क्रीडाप्रेमींसाठी एक वेगळाच अनुभव ठरला. 45 हजार प्रेक्षकांचा तो आवाज आणि मैदानावरील विजयाचा उत्साह हा एखाद्या व्हीआयपी बॉक्सपेक्षा कितीतरी पटीने सरस असतो, हेच थरुर यांनी आपल्या ट्विटमधून अधोरेखित केले. त्यांच्या या साधेपणाचे आणि नागपूरकर चाहत्यांसोबतच्या संवादाचे नेटकऱ्यांकडून मोठ्या प्रमाणावर कौतुक केले जात आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.