IND vs NZ Final: फायनलमध्ये अभिषेक-संजूचा 'विराट' अवतार! निर्भीड फटकेबाजीच्या जोरावर भारतीय सलामी जोडीनं मोडला 17 वर्षांचा रेकॉर्ड VIDEO

Abhishek Sharma Sanju Samson Record Partnership: आयसीसी टी-20 विश्वचषक 2026 च्या फायनल सामन्यात भारतीय सलामीवीरांनी क्रिकेट जगताला थक्क करणारी फटकेबाजी केली. भारताची नवी सलामीची जोडी अभिषेक शर्मा आणि संजू सॅमसन यांनी आपल्या झंझावाती फलंदाजीच्या जोरावर केवळ न्यूझीलंडच्या गोलंदाजीचा पालापाचोळा केला नाही, तर विश्वचषकाच्या इतिहासातील 17 वर्षे जुना विक्रमही मोडीत काढला. या जोडीने पहिल्या विकेटसाठी तब्बल 98 धावांची भागीदारी करुन टी-20 क्रिकेटमध्ये एक नवा अध्याय लिहिला.

अभिषेक शर्मा आणि संजू सॅमसन जोडीने सामन्याची सुरुवात अत्यंत सावध खेळीने केली, मात्र त्यानंतर तूफानी फटकेबाजी केली. विशेष म्हणजे, या जोडीने टी-20 विश्वचषकाच्या फायनल सामन्यात 50 किंवा त्यापेक्षा जास्त धावांची सलामी देणारी पहिली जोडी बनण्याचा मान मिळवला. अभिषेकच्या नावाचा झंझावात आणि संजू सॅमसनचा क्लास यांचा सुरेख संगम या डावात पाहायला मिळाला. या दोघांनी अवघ्या चार षटकांमध्ये 51 धावा फलकावर लावून प्रतिस्पर्धी संघाचे मनोबल खच्ची केले. इतक्या मोठ्या दडपणाच्या सामन्यात अशी निर्भीड सुरुवात करणे, हे भारतीय क्रिकेटच्या नव्या पिढीचे सामर्थ्य अधोरेखित करते.

या ऐतिहासिक कामगिरीसह अभिषेक आणि संजूने 17 वर्षांपूर्वीचा पाकिस्तानच्या नावावर असलेला विक्रम मोडला. 2009 च्या टी-20 विश्वचषकाच्या फायनल सामन्यात श्रीलंकेविरुद्ध लॉर्ड्सच्या मैदानावर कामरान अकमल आणि शाहजैब हसन यांनी 48 धावांची सलामी दिली होती. तब्बल 17 वर्षांपासून हा विक्रम अबाधित होता. अनेक विश्वचषक झाले, अनेक दिग्गज फलंदाज खेळले, पण फायनल सामन्यात 48 धावांची सलामी ओलांडणे कुणालाही जमले नव्हते. आज अभिषेक आणि संजूने 98 धावांची भागीदारी करत हा जुना रेकॉर्ड केवळ मोडलाच नाही, तर तो दुप्पट फरकाने मागे टाकला.

अभिषेक शर्माने आपल्या शैलीनुसार मैदानाच्या चहुबाजूंनी षटकारांची आतिषबाजी केली, तर दुसऱ्या बाजूला संजू सॅमसनने त्याला योग्य साथ देत धावगती कायम राखली. पहिल्या विकेटसाठी झालेल्या या 98 धावांच्या भागीदारीमुळे भारताने मोठ्या धावसंख्येचा पाया रचला. फायनल सामन्यातील दडपण झुगारुन या तरुण जोडीने ज्या प्रकारे फलंदाजी केली, त्याचे कौतुक जगभरातील दिग्गज क्रिकेटपटू करत आहेत.