Sangeeta Phogat Wins Bronze Medal Hungary Ranking Series tournament: भारताची कुस्तीपटू संगीता फोगटने पुन्हा एकदा देशाची मान उंचावली आहे. तिने हंगेरीतील बुडापेस्ट येथे वर्ल्ड रँकिंग सिरिज स्पर्धेत कांस्य पदकाची कमाई केली आहे. संगीता गेल्या अनेक महिन्यांपासून भारतीय कुस्ती महासंघाचे माजी अध्यक्ष ब्रिजभूषण शरण सिंग विरुद्ध आंदोलन करणाऱ्या 6 कुस्तीपटूंपैकी एक आहे.
संगीताने 59 किलोग्रॅम वजनी गटात हंगेरीची युवा कुस्तीपटू विक्टोपिया बोरसोसला पराभूत करत करत कांस्यपदकाची कमाई केली. संगीताला उपांत्य फेरीत पराभवाचा सामना करावा लागला होता.
पण तिने कांस्य पदकाच्या सामन्यात विक्टोरियाला 6-2 अशा फरकाने पराभूत केले. संगीता अमेरिकेच्या जेनिफर पेज रॉजर्सविरुद्ध पराभव स्विकारल्यानंतर रेपेचेज राऊंडमधून उपांत्य फेरीत पोहचली होती.
दरम्यान, संगीताने हे पदक संघर्ष करणाऱ्या महिलांना समर्पित केले आहे. तिने ट्वीट केले आहे की 'तुमच्या सर्वांचे शुभेच्छांचे संदेश माझ्यापर्यंत पोहोचत आहेत. यावेळी मी खूप भावूक आहे. तुमच्या सर्वांचे खूप खूप धन्यवाद. हे पदक फक्त माझे नाहीये, तुमच्या सर्वांचे आहे. मी हे पदक जगातील त्या सर्व संघर्ष करणाऱ्या महिलांना समर्पित करते, ज्या महिल्यांविरुद्ध झालेल्या गुन्ह्याविरुद्ध लढत आहेत. जय हिंद.'
या स्पर्धेत विनेश फोगटही सहभागी होणार होती. पण तिने ताप आणि अन्नातून विषबाधा झाल्याच्या कारणामुळे या स्पर्धेतून माघार घेतली. दरम्यान, आंदोलन करणाऱ्या कुस्तीपटूंसाठी एशियाड ट्रायल्सआधी झालेली ही स्पर्धा महत्त्वाची आहे.
ब्रिजभूषणवर महिला कुस्तीपटूंचा लैंगिक छळ करण्याचा आरोप काही भारतीय कुस्तीपटूंनी केला आहे. त्यामुळे कुस्तीपटूंनी आंदोलन सुरु केले होते. ब्रिजभूषणवर कारवाई केली जावी अशी आंदोलनकर्त्या कुस्तीपटूंची मागणी आहे. या आंदोलनात संगीतासह तिचा पती आणि भारताचा कुस्तीपटू बजरंग पुनिया, साक्षी मलिक हे स्टार कुस्तीपटूही सहभागी आहेत.
या आंदोलनानंतर 15 जून रोजी दिल्ली पोलिसांकडून 1000 पानांचे आरोपपत्र दाखल करण्यात आले आहे. मात्र, पॉक्सो प्रकरणातून त्यांना क्लीन चीट मिळाली होती.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.