राष्ट्रीय महिला जेतेपद पटकावलेल्या भक्तीसमोर रशियन खेळाडूचे आव्हान

पणजी: महिलांच्या फिडे विश्वकरंडक बुद्धिबळ स्पर्धेसाठी थेट पात्र ठरलेली गोमंतकीय इंटरनॅशनल मास्टर भक्ती कुलकर्णी (Bhakti Kulkarni) हिच्यासमोर पहिल्या फेरीत रशियन खेळाडूचे आव्हान असेल. स्पर्धा रशियातील सोची (Sochi) येथे सोमवारपासून खेळली जाईल.

स्पर्धेच्या संकेतस्थळानुसार, सलग दोन वेळा राष्ट्रीय महिला विजेतेपद पटकावलेली भक्ती या प्रतिष्ठित स्पर्धेच्या पहिल्या फेरीत रशियाची वूमन ग्रँडमास्टर अनास्तासिया परम्झिनी हिच्याविरुद्ध खेळेल. हा डाव जिंकल्यास भक्तीची दुसऱ्या फेरीत रशियाचीच वूमन ग्रँडमास्टर नतालिया पोगोनिना हिच्याशी गाठ पडेल. स्पर्धेत महिला गटात जगभरातील 103 खेळाडूंचा समावेश असून स्पर्धा बाद फेरी पद्धतीने खेळली जाईल.

फिडेच्या मानांकनात 29 वर्षीय भक्तीचे स्टँडर्ड प्रकारात 2391 एलो गुण असून 23 वर्षीय रशियन अनास्तासिया हिचे 2256 एलो गुण आहेत. गतवर्षी महामारीमुळे ऑनलाईन पद्धतीने झालेल्या ऑलिंपियाड व आशिया नेशन्स कप स्पर्धेत विजेतेपद मिळविलेल्या भारतीय संघात भक्तीचा समावेश होता. आता विश्वकरंडक स्पर्धेमुळे तिला देशाचे प्रतिनिधित्व करण्याची आणखी एक संधी मिळाली आहे.