Womens Football: रोझरी महाविद्यालयाने अजिंक्यपद राखले; अंतिम लढतीत सेंट झेवियर्सवर एका गोलने मात

Goa University Inter-Collegiate Football Championship: चुरशीच्या अंतिम लढतीत गतविजेत्या नावेलीच्या रोझरी महाविद्यालयाने म्हापशाच्या सेंट झेवियर्स महाविद्यालयास १-० असे नमवून गोवा विद्यापीठाच्या आंतरमहाविद्यालयीन महिला फुटबॉल स्पर्धेचे अजिंक्यपद राखले. अंतिम सामना सोमवारी ताळगाव पठारावरील विद्यापीठ मैदानावर झाला.

स्पर्धा सलग तीन वर्षे जिंकण्याचा पराक्रम रोझरी महाविद्यालयाने साधता. यापूर्वी त्यांनी २०१९-२० व २०२२-२३ मध्ये विजेतेपद मिळविले होते.

मध्यंतरी (२०२०-२१, २०२१-२२) कोविडमुळे स्पर्धा झाली नव्हती. सोमवारी रोझरी महाविद्यालयाच्या विजयात रिया पिरीस हिने सातव्या मिनिटास केलेला गोल निर्णायक ठरला.

रिया हिलाच स्पर्धेतील उत्कृष्ट खेळाडूचे बक्षीस मिळाले. गोवा फुटबॉल असोसिएशनचे अध्यक्ष कायतान फर्नांडिस यांच्यासह मिल्टन फर्नांडिस, कॉलिन वाझ, फ्रान्सिस लोबो, भालचंद्र जदार यांच्या उपस्थितीत बक्षीस वितरण झाले.