आयपीएल २०२७ च्या हंगामापूर्वी मुंबई इंडियन्सच्या संघात मोठ्या घडामोडी घडताना दिसत आहेत. प्रशिक्षकवर्गात बदल केल्यानंतर आता संघाच्या नेतृत्वाबाबतही चर्चा रंगू लागली आहे. हार्दिक पांड्याच्या भविष्याबाबत अनिश्चितता निर्माण झाल्याने मुंबई इंडियन्सचा पुढील कर्णधार कोण असेल, असा प्रश्न चाहत्यांना पडला आहे. अशातच अनुभवी फलंदाज आणि माजी कर्णधार रोहित शर्मा याच्याकडे पुन्हा नेतृत्वाची जबाबदारी सोपवली जाण्याची शक्यता वर्तवण्यात येत आहे.
मिळालेल्या वृत्तानुसार, मुंबई इंडियन्सच्या व्यवस्थापनाने रोहित शर्माला पुन्हा कर्णधारपद स्वीकारण्याची विनंती केली आहे. दुसरीकडे, हार्दिक पांड्याला अन्य संघात ट्रेड करण्याच्या चर्चाही सुरू आहेत. मात्र, हा ट्रेड झाला नाही, तर हार्दिक रोहितच्या नेतृत्वाखाली खेळण्यास तयार असल्याची माहिती समोर आली आहे. त्यामुळे आयपीएल २०२७ मध्ये मुंबई इंडियन्सचे नेतृत्व कोण करणार, याकडे क्रिकेट चाहत्यांचे लक्ष लागले आहे.
आयपीएल २०२६ चा हंगाम संपल्यानंतर मुंबई इंडियन्सच्या नेतृत्वाबाबत नव्याने विचार सुरू झाल्याचे वृत्त आहे. 'द इंडियन एक्स्प्रेस'च्या रिपोर्टनुसार, रोहित शर्मा पुन्हा एकदा मुंबई इंडियन्सचा कर्णधार बनू शकतो. रोहितने यापूर्वी मुंबईला पाच वेळा आयपीएलचे विजेतेपद मिळवून दिले आहे. त्यामुळे त्याचा अनुभव संघासाठी महत्त्वाचा ठरू शकतो.
विशेष म्हणजे, रोहित शर्माने कर्णधारपदासाठी युवा फलंदाज तिलक वर्माच्या नावाची शिफारस केल्याचेही वृत्तात म्हटले आहे. मात्र, फ्रँचायझीने रोहितलाच पुन्हा नेतृत्व करण्याची विनंती केली आहे. न्यूझीलंड दौऱ्यावर रवाना होण्यापूर्वी रोहित आणि संघ व्यवस्थापनामध्ये विविध विषयांवर चर्चा झाल्याची माहिती समोर आली आहे. नव्या प्रशिक्षकाच्या नियुक्तीवेळीही रोहितच्या सूचनांचा विचार करण्यात आल्याचे सांगितले जात आहे.
मुंबई इंडियन्सकडून अद्याप अधिकृत घोषणा करण्यात आलेली नाही. संघ व्यवस्थापनाने प्रशिक्षकवर्गातील नियुक्त्यांनंतर खेळाडूंच्या रिटेन्शनबाबत चर्चा करण्याचे ठरवले असल्याचे वृत्त आहे. आयपीएल २०२७ साठी खेळाडूंची रिटेन्शन आणि रिलीज यादी जाहीर करण्याची मुदत जवळ येत असल्याने मुंबई इंडियन्सकडून लवकरच महत्त्वाचे निर्णय घेतले जाऊ शकतात.
रोहित शर्माच्या नेतृत्वाबाबतचा निर्णयही याच प्रक्रियेचा भाग असू शकतो. त्यामुळे आगामी हंगामासाठी संघाची रणनीती काय असेल आणि युवा खेळाडूंना कोणत्या भूमिका दिल्या जातील, याची उत्सुकता वाढली आहे. मात्र, रोहितच्या कर्णधारपदाबाबत अद्याप अधिकृत पुष्टी झालेली नाही.
हार्दिक पांड्याच्या भविष्याबाबतही क्रिकेटविश्वात चर्चा सुरू आहे. मुंबई इंडियन्सकडून त्याला ट्रेडच्या माध्यमातून दुसऱ्या संघात पाठवले जाऊ शकते, अशी शक्यता वर्तवली जात आहे. मात्र, हा व्यवहार यशस्वी झाला नाही, तर हार्दिक मुंबई इंडियन्समध्येच कायम राहू शकतो.
रिपोर्टनुसार, हार्दिक पांड्या रोहित शर्माच्या नेतृत्वाखाली खेळण्यास तयार असल्याचे सांगितले जात आहे. त्यामुळे दोन्ही खेळाडू एकाच संघात राहिल्यास मुंबई इंडियन्सच्या संघरचनेत महत्त्वाचे बदल पाहायला मिळू शकतात. हार्दिकची अष्टपैलू कामगिरी आणि रोहितचा नेतृत्वाचा अनुभव यांचा संघाला फायदा होऊ शकतो. नोव्हेंबरच्या पहिल्या दोन आठवड्यांत मुंबई इंडियन्सच्या भविष्यासंदर्भात महत्त्वाची माहिती समोर येण्याची शक्यता आहे. त्यामुळे हार्दिक संघात राहणार की दुसऱ्या संघात जाणार, याबाबत चाहत्यांची उत्सुकता वाढली आहे.
आयपीएल २०२७ च्या तयारीसाठी मुंबई इंडियन्सने प्रशिक्षकवर्गातही महत्त्वाचे बदल केले आहेत. महेला जयवर्धने यांच्या जागी कायरन पोलार्ड याची मुख्य प्रशिक्षकपदी नियुक्ती करण्यात आल्याचे वृत्त आहे.
याशिवाय, रॉबिन उथप्पा याच्याकडे फलंदाजी प्रशिक्षकाची जबाबदारी सोपवण्यात आली आहे. मिचेल मॅक्लेनाघन गोलंदाजी प्रशिक्षक, तर टी. दिलीप क्षेत्ररक्षण प्रशिक्षक म्हणून काम पाहणार आहेत. धवल कुलकर्णी याची विकासात्मक गोलंदाजी प्रशिक्षकपदी नियुक्ती करण्यात आली आहे.
या बदलांमुळे मुंबई इंडियन्स आगामी हंगामासाठी नव्या रणनीतीसह मैदानात उतरण्याची शक्यता आहे. मात्र, रोहित शर्मा आणि हार्दिक पांड्या यांच्या भूमिकांबाबत फ्रँचायझीच्या अधिकृत घोषणेची प्रतीक्षा कायम आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.