बर्मिंगहॅममधील युटिलिटा एरिनामध्ये झालेल्या जागतिक डेडलिफ्ट चॅम्पियनशिपमध्ये मेक्सिकोच्या 25 वर्षीय राऊल फ्लोरेसनं अशी कामगिरी केली, ज्यानं संपूर्ण स्ट्रॉंगमॅन जगाचं लक्ष वेधून घेतलं. फ्लोरेसनं तब्बल 511 किलो वजन उचलत नवा जागतिक विक्रम आपल्या नावावर केला.
या स्पर्धेपूर्वी डेडलिफ्टचा जागतिक विक्रम आइसलँडच्या हाफथॉर ब्योर्नसनच्या नावावर होता. 2025 च्या जागतिक डेडलिफ्ट चॅम्पियनशिपमध्ये ब्योर्नसननं 510 किलो वजन उचलून हा विक्रम प्रस्थापित केला होता. मात्र, अवघ्या एका किलोच्या फरकानं का होईना, फ्लोरेसनं हा विक्रम मागे टाकत डेडलिफ्टच्या इतिहासात आपलं नाव नोंदवलं.
मुख्य स्पर्धेपूर्वी फ्लोरेसची कामगिरी पाहता तो काहीतरी मोठं करणार असल्याचे संकेत मिळाले होते. स्पर्धेच्या सरावादरम्यान त्यानं 504 किलो वजन उचलण्यात यश मिळवलं होतं. त्यामुळे मुख्य इव्हेंटमध्ये त्याच्याकडून दमदार कामगिरीची अपेक्षा निर्माण झाली होती.
मुख्य स्पर्धेतील निर्णायक प्रयत्नासाठी फ्लोरेस बारबेलसमोर उभा राहिला, तेव्हा त्याच्यावर मोठी जबाबदारी होती. त्यानं पूर्ण ताकद लावत बारबेल जमिनीवरून उचलला आणि 511 किलो वजन यशस्वीपणे लॉकआउट केलं. हा प्रयत्न यशस्वी होताच युटिलिटा एरिनामध्ये उपस्थित प्रेक्षकांनी टाळ्यांच्या कडकडाटात त्याचं अभिनंदन केलं.
फ्लोरेसची ही कामगिरी आणखी खास आहे, कारण स्ट्रॉंगमॅनच्या इतिहासात 500 किलोपेक्षा अधिक वजन उचलणाऱ्या मोजक्या खेळाडूंमध्ये त्याचा समावेश झाला आहे. अर्ध्या टनापेक्षा अधिक वजन उचलणं हे डेडलिफ्टच्या जगातील अत्यंत कठीण आणि प्रतिष्ठेचं आव्हान मानलं जातं.
2016 मध्ये ब्रिटनच्या एडी हॉलनं डेडलिफ्टमध्ये 500 किलो वजन उचलून इतिहास घडवला होता. त्यावेळी ही कामगिरी अशक्यप्राय मानली जात होती. मात्र, त्यानंतर या खेळात विक्रमांची उंची सातत्यानं वाढत गेली.
एडी हॉलच्या 500 किलोच्या विक्रमानंतर हाफथॉर ब्योर्नसननं 501 किलो वजन उचलून त्याला मागे टाकलं. पुढे ब्योर्नसननं 2025 मध्ये 510 किलो वजन उचलत पुन्हा एकदा जागतिक विक्रम आपल्या नावावर केला. आता फ्लोरेसनं 511 किलो वजन उचलून त्याच विक्रमाला मागे टाकलं आहे.
राऊल फ्लोरेस गेल्या काही काळापासून डेडलिफ्टच्या क्रमवारीत वेगाने वर येत आहे. त्याच्या ताकदीसोबतच तंत्र आणि सातत्यपूर्ण सरावामुळे त्याच्याकडून भविष्यात आणखी मोठ्या कामगिरीची अपेक्षा केली जात आहे.
511 किलोचा विक्रम प्रस्थापित केल्यानंतर फ्लोरेससमोर आता स्वतःचाच विक्रम सुधारण्याचं आव्हान असेल. त्याच्या कामगिरीमुळे क्रीडा विश्व जगात पुन्हा एकदा 500 किलोपेक्षा अधिक वजन उचलण्याच्या मर्यादा कुठपर्यंत जाऊ शकतात, याची चर्चा सुरू झाली आहे. 25 व्या वर्षीच जागतिक विक्रम आपल्या नावावर करणाऱ्या फ्लोरेसच्या पुढील कामगिरीकडे आता स्ट्रॉंगमॅन चाहत्यांचं लक्ष लागलं आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.