भारत आणि इंग्लंड संघात कसोटी मालिका सध्या सुरू असून पाचवा आणि शेवटचा सामना धरमशाला येथे गुरुवारपासून (8 मार्च) सुरू झाला आहे. या सामन्यात भारताचा अनुभवी फिरकीपटू आर अश्विनने दुसऱ्या डावात 5 विकेट्स घेत मोठा विक्रम केला आहे.
या सामन्यात भारताचा पहिला डाव तिसऱ्या दिवशी 477 धावांवर संपला. त्यामुळे इंग्लंडचा संघ दुसऱ्या डावात फलंदाजी करण्यासाठी उतरला. मात्र, अश्विनच्या फिरकी गोलंदाजीपुढे इंग्लंडचे फलंदाज संघर्ष करताना दिसले.
त्याने तिसऱ्या दिवसाच्या पहिल्याच सत्रात इंग्लंडचे सलामीवीर झॅक क्रावली (0) आणि बेन डकेट (2) यांना बाद केले. त्यानंतर त्याने ऑली पोपलाही (19) माघारी धाडले. पहिले सत्र संपण्यापूर्वी त्याने इंग्लंडचा कर्णधार बेन स्टोक्सला 2 धावांवरच त्रिफळाचीत केले.
यानंतर दुसऱ्या सत्राच्या सुरुवातीलाच अश्विनने बेन फोक्सला 8 धावांवर त्रिफळाचीत करत 5 विकेट्स पूर्ण केल्या. त्याने कसोटीमध्ये एका डावात 5 किंवा त्यापेक्षा अधिक विकेट्स घेण्याची ही 36 वी वेळ आहे.
त्यामुळे तो कसोटीत सर्वाधिक वेळा एका डावात 5 विकेट्स घेणारा भारतीय गोलंदाजही बनला आहे. त्याने कसोटीत सर्वाधिक वेळा एका डावात 5 विकेट्स घेणाऱ्या गोलंदाजांच्या यादीत अनिल कुंबळेला मागे टाकले आणि सर रिचर्ड हॅडली यांची बरोबरी केली आहे.
कसोटीत सर्वाधिकवेळा डावात 5 विकेट्स घेणारे गोलंदाज (9 मार्च 2024 पर्यंत)
67 वेळा- मुथय्या मुरलीधरन
37 वेळा - शेन वॉर्न
36 वेळा - सर रिचर्ड हॅडली
36 वेळा - आर अश्विन
35वेळा - अनिल कुंबळे
34 वेळा - रंगना हेराथ
विशेष म्हणजे धरमशाला येथे होत असलेला कसोटी सामना आर अश्विनचा कारकिर्दीतील 100 वा कसोटी सामना आहे. तो 100 कसोटी सामने खेळणारा भारताचा 14 वा खेळाडू आहे.
त्याने त्याचा हा 100 वा कसोटी सामना खासही बनवला आहे. त्याने या सामन्यात पहिल्या डावातही 4 विकेट्स घेतल्या होत्या. त्यामुळे तो 100 व्या कसोटीत 9 विकेट्स घेणारा मुथय्या मुरलीधरननंतरचा दुसराच गोलंदाज ठरला आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
