Goa Chess Tournament: प्रयांक, दृषा यांना 7 वर्षांखालील बुद्धिबळात विजेतेपद

Goa Under 7 Chess Tournament: राज्यस्तरीय अखिल गोवा 7 वर्षांखालील बुद्धिबळ स्पर्धेत खुल्या गटात सासष्टी तालुक्याचा प्रयांक गावकर याने, तर मुलींत मुरगावची दृषा घोंगे हिने विजेतेपद मिळविले. स्पर्धा फातोर्डा येथील पंडित जवाहरलाल नेहरू स्टेडियमवर झाली.

सासष्टी तालुका बुद्धिबळ संघटनेने गोवा बुद्धिबळ संघटनेच्या मान्यतेने स्पर्धा घेतली होती. प्रयांक याने विजेतेपदावर शिक्कामोर्तब करताना अखेरच्या फेरीत इव्हान तेलिस याला नमविले.

प्रयांकने स्पर्धेत अपराजित राहताना सहा फेऱ्यांतून साडेपाच गुणांची कमाई केली. मुलींत विजेती ठरलेल्या दृषा हिने अपराजित राहत पाच गुण नोंदविले.

खुल्या गटात इव्हान तेलिस उपविजेता ठरला. नारायण (आरव) प्रभुदेसाई, सार्थक नाईक, रोनेल फर्नांडिस, स्कायलर फर्नांडिस यांना अनुक्रमे तिसरा ते सहावा क्रमांक मिळाला.

मुलींत वानिया दुकळे हिला दुसरा क्रमांक मिळाला. शनाया देसाई, तृषा पटेकर, सान्वी देसाई, सिदोनिया दा कुन्हा यांना अनुक्रमे तिसरा ते सहावा क्रमांक प्राप्त झाला.

पोलिस अधिकारी देऊ माणगावकर, गोवा बुद्धिबळ संघटनेचे सचिव आशेष केणी, सासष्टी तालुका बुद्धिबळ संघटनेचे उपाध्यक्ष दामोदर जांबावली, खजिनदार दिलीप वेर्णेकर यांच्या उपस्थितीत बक्षीस वितरण झाले.

आशेष स्पर्धेचे मुख्य आर्बिटर होते. त्यांना ज्योत्स्ना सारिपल्ली, आशा शिरोडकर, रिदिेकेश वेर्णेकर यांचे सहकार्य लाभले.