GCA Ground : पर्वरी मैदानाच्या खेळपट्ट्यांना ‘स्पोर्टिंग’ साज; जीसीए सचिव रोहन देसाई यांची माहिती

Porvorim News : पर्वरी येथील जीसीए अकादमी मैदानावरील खेळपट्ट्यांना लागलेला ‘पाटा’ डाग पुसून काढण्यासाठी गोवा क्रिकेट संघटनेचे कंबर कसली असून आगामी मोसमापूर्वी ‘स्पोर्टिंग’ साज मिळेल, अशी माहिती संघटनेचे अध्यक्ष रोहन गावस देसाई यांनी दिली.

आगामी मोसमातील क्रिकेट सामन्यांसाठी नूतनीकरण स्वरूपातील खेळपट्ट्या सज्ज होतील, असा विश्वासही त्यांनी व्यक्त केला.

‘‘चांगले क्रिकेट खेळले जावे या उद्देशाने आम्ही खेळपट्ट्यांचे काम हाती घेतले आहे. त्यासाठी मी गतमोसमातच इच्छुक होतो, पण पुरेसा वेळ उपलब्ध नसल्याचे काम यंदा मोसमाच्या सुरवातीस पूर्ण करण्याचे ठरविले. मैदानावरील पाचपैकी दोन खेळपट्ट्यांसाठी लाल माती वापरली आहे. त्यामुळे स्पोर्टिंग निकाल अपेक्षित आहेत. बाकी खेळपट्ट्यांसाठी काळी माती वापरण्यात येत आहे,’’ असे रोहन यांनी सांगितले.

ते पुढे म्हणाले, की ‘‘खेळपट्टीविषयक तज्ज्ञांच्या माहितीनुसार लाल मातीच्या खेळपट्टी स्पोर्टिंग असतात, त्यामुळे आम्ही या मातीच्या खेळपट्ट्यांना प्राधान्य दिले आहे.’’

रोहन यांनी गतमोसमातील उदाहरण दिले. ते म्हणाले, ‘‘या मैदानावर गतमोसमात कर्नाटकविरुद्धचा रणजी करंडक सामना मोसमाच्या सुरवातीस झाला. कर्नाटकने प्रथम फलंदाजी करताना सहाशे धावांचा डोंगर रचला. आम्हाला अशाप्रकारच्या खेळपट्ट्या नको आहेत. आमच्या खेळाडूंचेही असेच म्हणणे आहे. त्यामुळे विचारविनिमय केल्यानंतर खेळपट्ट्यांचे काम करण्याचे ठरले. स्पोर्टिंग खेळपट्ट्यांमुळे फलंदाज व गोलंदाजांना समान संधी मिळेल.’’

यंदा बीसीसीआय देशांतर्गत क्रिकेट स्पर्धेतील एकूण १० सामने गोव्यात होणार आहेत, त्यापैकी चार सामने रणजी करंडक क्रिकेट स्पर्धेतील आहेत. नियोजनानुसार पुढील वर्षी जानेवारी-फेब्रुवारीत चारही रणजी क्रिकेट सामने खेळले जातील. तोपर्यंत नव्याने काम करण्यात आलेल्या खेळपट्ट्यांच्या मशागतीसाठी पुरेसा वेळ जीसीएला मिळेल.

पर्वरीतील रणजी क्रिकेट सामने

(२०१० ते २०२३)

एकूण सामने : ३४

गोवा विजयी : ९, पराभूत : १०, अनिर्णित : १५

गोव्याविरुद्ध धावांचा डोंगर

पंजाब : सर्वबाद ६३५ (२४ ते २७ ऑक्टोबर २०१७)

कर्नाटक : ७ बाद ६०३ घोषित (२७ ते ३० डिसेंबर २०२२)