37 th National Games 2023 Goa: गोव्यात होणाऱ्या 37व्या राष्ट्रीय क्रीडा स्पर्धेचे पंतप्रधान नरेंद्र मोदी यांच्या हस्ते उद्घाटन होणार आहे. 26 ऑक्टोबर रोजी संध्याकाळी 6.30 वाजता फातोर्डा येथील पंडित जवाहरलाल नेहरू स्टेडियमवर उद्घाटन समारंभ होईल.
क्रीडा स्पर्धेची सर्व तयारी 20 ऑक्टोबर पर्यंत पूर्ण करण्याची ग्वाही, मुख्यमंत्री डॉ प्रमोद सावंत यांनी दिली.
गोव्यात 25 ऑक्टोबर ते 6 नोव्हेंबरदरम्यान राष्ट्रीय क्रीडा स्पर्धा होणार आहे. 26 ऑक्टोबर रोजी फातोर्डा येथील पंडित जवाहरलाल नेहरू स्टेडियमवर पंतप्रधान नरेंद्र मोदी यांच्या हस्ते या कार्यक्रमाचा उद्घाटन समारंभ होईल, अशी माहिती मुख्यमंत्री सावंत यांनी दिली आहे.
राष्ट्रीय क्रीडा स्पर्धेत मल्लखांब, कलरीपयट्टू, गटका, लगोरी आणि योगा या पाच देशी खेळांसह 43 विविध राष्ट्रीय खेळांचा समावेश आहे. या स्पर्धेत आठ हजारहून अधिक खेळाडू सहभागी होण्याची शक्यता आहे.
स्पर्धा व्यवस्थित पार पडावी यासाठी आयोजकांकडून काळजी घेतली जात असून, स्पर्धा सुरळीत पार पाडण्यासाठी स्वयंसेवकांची मदत घेतली जाणार आहे. स्पर्धेसाठी स्वयंसेवकांची ऑनलाईन पद्धतीने भरती केली जाणार आहे.
दरम्यान, राष्ट्रीय क्रीडा स्पर्धेच्या उद्‍घाटनास फक्त 15 दिवस उरले आहेत आणि गोव्यातील या स्पर्धेतील तयारीबाबत प्रचंड गोंधळ आहे, आयोजन यशस्वी ठरविण्यासाठी कालावधी अत्यंत कमी असून या कारणास्तव 37 वी राष्ट्रीय स्पर्धा काही महिन्यांसाठी लांबणीवर टाकावी, अशी सूचनावजा मागणी गुजरात राज्य ऑलिंपिक संघटनेचे सचिव आय. डी. नानावटी यांनी केली आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.