ओडिशा एफसीने ईस्ट बंगालला नमवून सलग दुसरा विजय नोंदवला

पणजी: तब्बल दहा गोल झालेल्या इंडियन सुपर लीग (ISL) फुटबॉल सामन्यात मंगळवारी ओडिशा एफसी (Odisha FC) संघ वरचढ ठरला. त्यांनी आठव्या मोसमातील सलग दुसरा विजय नोंदविताना ईस्ट बंगालला पिछाडीवरून 6-4 फरकाने हरविले. वास्को येथील टिळक मैदानावर झालेल्या लढती गोलची बरसात झाली. त्यात दोन्ही संघांच्या मिळून एकूण सात खेळाडूंनी गोल केले. त्यापैकी सहा गोल बदली खेळाडूंद्वारे झाले. पूर्वार्धात ओडिशा संघ 3-1 फरकाने आघाडीवर होता. सलग दुसऱ्या विजयामुळे ओडिशा एफसीचे आता सहा गुण झाले आहेत. त्यांनी गुणतक्त्यात एटीके मोहन बागान व चेन्नईयीन एफसीला गाठले आहे. तिसऱ्या लढतीत दुसरा सामना गमवावा लागल्यामुळे ईस्ट बंगालचा एक गुण कायम राहिला.

ओडिशा एफसीसाठी हेक्टर रोदास व बदली खेळाडू अरिदाई सुवारेझ यांनी प्रत्येकी दोन, तर हावी हर्नांडेझ व इसाक वनलालरुआतफेला यांनी प्रत्येकी एक गोल केला. ईस्ट बंगालतर्फे डॅनियल चिमा चुक्वू याने दोन, तर डॅरेन सिडोल व बदली थोंगखोसिएम (सेम्बाई) हाओकिप यांनी प्रत्येकी एक गोल केला. नेदरलँड्सच्या सिडोल याने 13व्या मिनिटास ईस्ट बंगालला आघाडीवर नेल्यानंतर, स्पेनच्या हेक्टर रोदास याने अनुक्रमे 33 व 40व्या मिनिटास गोल करून ओडिशाला 2-1 अशी आघाडी मिळवून दिली. स्पॅनिश हावी हर्नांडेझ याने यंदाच्या स्पर्धेतील तिसरा गोल करताना 45व्या मिनिटास ओडिशाची आघाडी 3-1 अशी भक्कम केली.

बदली स्पॅनिश खेळाडू अरिदाई याने 71व्या मिनिटास ओडिशाची आघाडी 4-1 अशी वाढविली. बदली खेळाडू हाओकिप याने 80व्या मिनिटास ईस्ट बंगालची पिछाडी 2-4 अशी कमी केल्यानंतर पुढील चार मिनिटांत आणखी चार गोल झाले. 20 वर्षीय बदली खेळाडू इसाक वनलालरुआतफेला याने आयएसएल स्पर्धेतील वैयक्तिक पहिला गोल करताना 82व्या मिनिटास ओडिशाची आघाडी 5-2 अशी मजबूत केली. नंतर एका मिनिटास नायजेरियन डॅनियल चुक्वू याने 90व्या आणि नंतर पेनल्टी फटक्यावर 90+2 व्या मिनिटास गोल केल्यामुळे ईस्ट बंगालची पिछाडी 4-5 अशी कमी झाली आणि बरोबरीची संधी निर्माण झाली. मात्र अरादाई याने सामन्यातील वैयक्तिक दुसरा आणि यंदाच्या स्पर्धेतील तिसरा गोल नोंदवत 90+4 व्या मिनिटास ओडिशा एफसीच्या विजयावर शिक्कामोर्तब केले.