New Zealand vs South Africa Test: दोन कसोटी सामन्यांच्या मालिकेतील पहिला सामना न्यूझीलंड आणि दक्षिण आफ्रिका यांच्यात माउंट माउंगानुई येथे खेळला जात आहे. तर यजमान संघाने पहिल्या डावात पाहुण्या संघावर वर्चस्व राखले आहे.
एकदिवसीय विश्वचषक 2023 मध्ये आपली छाप पाडणारा युवा फलंदाज रचिन रवींद्रने पहिल्या डावातच द्विशतक झळकावले. कारकिर्दीतील चौथा सामना खेळत असलेल्या रचिनने 366 चेंडूत 240 धावांची उत्कृष्ट खेळी खेळली. रचिन रवींद्रच्या या दमदार खेळीमुळे न्यूझीलंडला पहिल्या डावात 511 धावा करता आल्या. तसेच, रचिन रवींद्रच्या या द्विशतकानंतर त्याने अनेक विक्रमही आपल्या नावावर केले.
डावखुरा फलंदाज रचिन रवींद्र चौथ्या क्रमांकावर फलंदाजीसाठी मैदानात आला. त्याने केन विल्यमसनसोबत 232 धावांची मोठी भागीदारीही केली. रचिन कसोटीत द्विशतक झळकावणारा न्यूझीलंडचा दुसरा सर्वात तरुण फलंदाज ठरला आहे. याआधी केन विल्यमसन दुसऱ्या स्थानावर होता.
दरम्यान, न्यूझीलंडसाठी कसोटीत सर्वात कमी वयात द्विशतक झळकावण्याचा विक्रम मॅथ्यू सिंक्लेअरच्या नावावर आहे.सिंक्लेअरने 1999 मध्ये वेस्ट इंडिजविरुद्धच्या पदार्पणाच्या सामन्यात द्विशतक झळकावले होते. मॅथ्यू सिंक्लेअरने वेस्ट इंडिजविरुद्ध 214 धावा केल्या होत्या. आपल्या पहिल्या कसोटी शतकाचे दुहेरी शतकात रुपांतर करणारा रचिन हा न्यूझीलंडचा चौथा फलंदाज आहे. तसेच, पहिल्या कसोटी शतकात सर्वाधिक 240 धावा केल्यानंतर रचिन रवींद्र आता न्यूझीलंडचा पहिला फलंदाज बनला आहे. ज्याने पहिल्या कसोटीत सर्वात मोठी खेळी खेळली आहे.
भारत आणि इंग्लंड यांच्यात खेळल्या जात असलेल्या पाच सामन्यांच्या कसोटी मालिकेतील दुसऱ्या सामन्यात यशस्वी जयस्वालने 209 धावांची उत्कृष्ट खेळी केली. त्यानंतर 2023-25 ची वर्ल्ड टेस्ट चॅम्पियनमध्ये यशस्वी जयस्वालच्या नावावर सर्वाधिक धावसंख्येचा विक्रम झाला होता. पण आता दक्षिण आफ्रिकेविरुद्ध 240 धावा केल्यानंतर हा विक्रम रचिन रवींद्रच्या नावावर झाला आहे. रचिन रवींद्र 2023-25 वर्ल्ड टेस्ट चॅम्पियनशिपमध्ये सर्वाधिक वैयक्तिक धावा करणारा फलंदाज बनला आहे.
न्यूझीलंडचा 24 वर्षीय युवा फलंदाज रचिन द्रविड हा भारतीय वंशाचा आहे. रचिन रवींद्रचा जन्म न्यूझीलंडमध्ये झाला असला तरी. त्याच्या नावामागे एक कहाणी आहे. खरे तर, त्याचे वडील सचिन तेंडुलकर आणि राहुल द्रविडचे चाहते होते. त्यानंतर त्यांनी राहुल द्रविडच्या नावावरुन 'रा' आणि सचिन तेंडुलकरच्या नावावरुन 'चिन' घेऊन 'रचिन' हे नाव तयार केले. यावर्षी आयपीएल 2024 मध्ये रचिन रवींद्र धोनीच्या नेतृत्वाखाली खेळताना दिसणार आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
