Nicholas Pooran 31 Ball Century MCL 2026: मेजर क्रिकेट लीगमधील एलिमिनेटर सामन्यात एमआय न्यूयॉर्ककडून खेळताना वेस्ट इंडिजच्या निकोलस पूरनने टी-20 क्रिकेटमधील आजवरची सर्वात धमाकेदार खेळी खेळली. वॉशिंग्टन फ्रीडमविरुद्धच्या या एलिमिनेटर सामन्यात पूरनने गोलंदाजांची अक्षरशः पिसे काढत अवघ्या 31 चेंडूंत आपले झंझावाती शतक झळकावले. सलामीवीर मोनांक पटेल आऊट झाल्यानंतर आलेल्या पूरनने पहिल्या चेंडूपासूनच आक्रमक पवित्रा घेतला आणि चौफेर फटकेबाजी केली.
गेल्या काही काळापासून टी-20 क्रिकेटमध्ये (T-20 Cricket) खराब फॉर्मशी झगडणाऱ्या पूरनने या महत्त्वाच्या नॉकआउट सामन्यात 321.21 च्या स्ट्राईक रेटने धावांचा पाऊस पाडत फॉर्ममध्ये पुनरागमन केले. त्याने एकूण 33 चेंडूंत 106 धावांची आतिशी खेळी खेळळी, ज्यामध्ये 5 चौकार आणि तब्बल 13 गगनचुंबी षटकारांचा समावेश होता.
पूरन व्यतिरिक्त एमआय न्यूयॉर्कचा अनुभवी खेळाडू कीरॉन पोलार्डनेही मैदानावर आपल्या नावाचा दरारा दाखवला. पोलार्डने अवघ्या 25 चेंडूंत 64 धावांची तुफानी खेळी खेळली. विशेष म्हणजे, त्याच्या या खेळीत केवळ एक चौकार आणि तब्बल 8 उत्तुंग षटकार समाविष्ट होते. पूरन आणि पोलार्डने मिळून अवघ्या काही षटकांत 56 धावांची वेगवान भागीदारी रचली. या दोन कॅरेबियन स्टार्सच्या जोरावर एमआय न्यूयॉर्कने 20 षटकांत 266 धावांचा डोंगराएवढा स्कोर फलकावर लावला. नॉकआउट सामन्यातील ही धावसंख्या पाहता एमआयचा विजय निश्चित मानला जात होता, परंतु क्रिकेटच्या अनिश्चिततेचा थरार यानंतर पाहायला मिळाला.
एमआय न्यूयॉर्कने उभारलेल्या 266 धावांच्या या महाकाय आव्हानाचा पाठलाग करताना वॉशिंग्टन फ्रीडमच्या फलंदाजांनी चमत्कारिक कामगिरी केली. स्टीव्ह स्मिथ आणि अँड्रीज गॉस या दोन्ही फलंदाजांनी एमआयच्या गोलंदाजांवर प्रतिहल्ला चढवला आणि आपापली शतके ठोकून सामन्याचे चित्र पूर्णपणे पलटवले. पूरनच्या ऐतिहासिक शतकानंतरही एमआय न्यूयॉर्कच्या गोलंदाजांना या धावांचा बचाव करता आला नाही. वॉशिंग्टन फ्रीडमच्या संघाने हे कठीण लक्ष्य अवघ्या 18.4 षटकांत, म्हणजेच 8 चेंडू राखूनच पार केले आणि सामना आपल्या नावे केला. निकोलस पूरनची शतकी खेळी चाहत्यांच्या दीर्घकाळ स्मरणात राहील, मात्र त्याच्या संघाला या एलिमिनेटर सामन्यात अत्यंत नाट्यमय पराभवाचा सामना करावा लागला.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.