ODI World Cup 2023 NZ vs BAN: आयसीसी एकदिवसीय विश्वचषक 2023 मध्ये आज न्यूझीलंड आणि बांगलादेशचे संघ आमनेसामने आहेत. या सामन्याची खास बाब म्हणजे या विश्वचषकात कर्णधार केन विल्यमसन पहिल्यांदाच आपल्या संघाची कमान सांभाळताना दिसत आहे.
यापूर्वी संघाचा कर्णधार टॉम लॅथम होता, विल्यमसन दुखापतीनंतर पुनरागमन करत आहे. न्यूझीलंडच्या कर्णधाराने नाणेफेक जिंकून प्रथम गोलंदाजी करण्याचा निर्णय घेतला.
त्याच क्षणी त्याचा निर्णय योग्य असल्याचे दिसून आले, जेव्हा सामन्याच्या पहिल्याच चेंडूवर वेगवान गोलंदाज ट्रेंट बोल्टने सलामीवीर लिटन दासला बाद करुन पॅव्हेलियनमध्ये पाठवले.
बांगलादेशने खूप प्रयत्न केले, पण एकाही फलंदाजाला तग धरता आला नाही. मात्र, बांगलादेशचा स्टार फलंदाज मुशफिकुर रहीम आणि कर्णधार शाकीब अल हसन यांनी मिळून वीरेंद्र सेहवाग आणि सचिन तेंडुलकरचा मोठा विक्रम मोडला.
खरे तर, एकदिवसीय विश्वचषकाच्या इतिहासात आतापर्यंत दोन फलंदाजांमधील भागीदारीमुळे जोडलेल्या धावांबद्दल बोलायचे झाल्यास, ऑस्ट्रेलियाच्या अॅडम गिलख्रिस्ट आणि मॅथ्यू हेडनचे नाव प्रथम येते.
या दोघांनी मिळून 20 डावांमध्ये आपल्या संघासाठी 1220 धावा जोडल्या आहेत. यानंतर आतापर्यंत सचिन तेंडुलकर (Sachin Tendulkar) आणि वीरेंद्र सेहवाग यायचे, पण आता हे दोघेही मागे पडले आहेत, त्यांच्या जागी शाकिब अल हसन आणि मुशफिकर रहीम आले आहेत.
एकीकडे सचिन आणि सेहवागने 20 डावात मिळून 971 धावा केल्या होत्या, तर आता मुशफिकर रहीम आणि शकिब अल हसन यांनी मिळून 19 डावात 972 धावा केल्या आहेत.
एवढेच नाही तर एकदिवसीय विश्वचषकात सर्वाधिक 50 हून अधिक धावांच्या भागीदारीच्या बाबतीत हे दोघेही आता सचिन आणि सेहवागच्या बरोबरीने आले आहेत.
गिलख्रिस्ट आणि हेडन यांनी मिळून 12 वेळा ही कामगिरी केली आहे, तर सचिन आणि सेहवागने 8 वेळा 50 हून अधिक धावांची भागीदारी केली आहे. आता रहीम आणि शाकिबनेही ही कामगिरी आठ वेळा केली आहे.
बांगलादेशच्या (Bangladesh) डावाबद्दल बोलायचे झाल्यास, न्यूझीलंडच्या शानदार गोलंदाजीसमोर संपूर्ण संघ 254 धावाच करु शकला. म्हणजेच आता न्यूझीलंडला सलग तिसरा सामना जिंकण्यासाठी 246 धावांची गरज आहे.
बांगलादेशकडून रहीमने सर्वाधिक धावा केल्या. त्याने 75 चेंडूत 66 धावांची खेळी खेळली. तर कर्णधार शाकिबने 51 चेंडूत 40 धावा केल्या. अखेरीस महमुदल्लाहने 49 चेंडूत 41 धावा केल्या. इतर कोणताही फलंदाज मोठी खेळी खेळण्यात अपयशी ठरला.
बांगलादेशने या वर्षात आतापर्यंत दोन सामने खेळले आहेत, त्यापैकी त्यांनी अफगाणिस्तानला पराभूत केले आहे, तर संघाला इंग्लंडकडून दारुण पराभवाला सामोरे जावे लागले आहे. संघाचे सध्या केवळ दोन गुण आहेत.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.