Indian Super League Football: एफसी गोवाने इंडियन सुपर लीग (आयएसएल) फुटबॉल स्पर्धा खंडित होण्यापूर्वी वर्षअखेरीस अपराजित राहण्यात यश मिळविले, पण शुक्रवारी नॉर्थईस्ट युनायटेडविरुद्ध त्यांना विजय शक्य झाला नाही आणि १-१ अशा गोलबरोबरीवर समाधान मानावे लागले.
सामन्यातील दोन्ही गोल पूर्वार्धातील खेळात सहा मिनिटांच्या अंतराने झाले. कार्लोस मार्टिनेझ याच्या अगदी जवळून हेडिंगचा प्रतिस्पर्धी गोलरक्षकाला अंदाज आला नाही आणि एफसी गोवा संघाने २०व्या मिनिटास आघाडी घेतली. मात्र ती जास्त काळ टिकली नाही.
एफसी गोवाच्या बचावफळीस एम. एस. जिथिन याच्या पहारा ठेवता आला नाही. त्याचा लाभ उठवत या मध्यरक्षकाने २६व्या मिनिटाला नॉर्थईस्ट युनायटेडला बरोबरी साधून दिली.
नॉर्थईस्टच्या बचावफळीने एफसी गोवा संघाला मोकळीक दिली नाही, त्यामुळे त्यांना सराईतपणे मुक्त खेळ करता आला नाही.
बरोबरीमुळे दुसरे स्थान
केरळा ब्लास्टर्सचे आता १२ लढतीतून २६ गुणांसह अव्वल स्थानी कायम राहिले. एफसी गोवा आणि ओडिशा एफसीचे प्रत्येकी २४ गुण झाले आहेत. +११ गोलसरासरीमुळे एफसी गोवा दुसऱ्या, तर +१० गोलसरासरीमुळे ओडिशा एफसी तिसऱ्या क्रमांकावर आहे.
एफसी गोवाने आता १० लढतीत सात विजय व तीन बरोबरी अशी कामगिरी साधली आहे. नॉर्थईस्ट युनायटेडची ही सहावी बरोबरी ठरली.
१२ लढतीनंतर त्यांचे १२ गुण झाले असून सहावा क्रमांक कायम आहे. नॉर्थईस्ट युनायटेडविरुद्धच्या १९ आयएसएल लढतीत एफसी गोवाची ही दहावी बरोबरी ठरली.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
