Shubman Gill: गिलची तब्येत कशीये? इशान किशन म्हणाला, 'तो आता...'

Ishan Kishan Gave Health Update on Shubman Gill:

वनडे वर्ल्डकप 2023 स्पर्धेत बुधवारी भारत विरुद्ध अफगाणिस्तान संघात सामना झाला. दिल्लीतील अरुण जेटली स्टेडियमवर झालेल्या या सामन्यात भारताने 8 विकेट्सने सहज विजय मिळवला. दरम्यान, या सामन्यानंतर भारताचा यष्टीरक्षक फलंदाज इशान किशनने शुभमन गिलबाबत महत्त्वाची माहिती दिली आहे.

भारताचा प्रतिभाशाली युवा सलामीवीर शुभमन गिलला वर्ल्डकप 2023 स्पर्धेला सुरुवात होण्याच्या काही दिवस आधीच डेंग्यू झाल्याचे निदान झाले. त्यामुळे डेंग्युमुळे त्याची तब्येत बिघडली होती.

त्यामुळे तो भारताकडून ऑस्ट्रेलिया आणि अफगाणिस्तान या संघाविरुद्धचे सामनेही खेळू शकला नाही. त्याच्याऐवजी इशान किशनला सलामीला खेळण्याची संधी देण्यात आली होती.

महत्त्वाचे म्हणजे चेन्नईला भारताने ऑस्ट्रेलियाविरुद्धचा सामना खेळल्यानंतर गिल संघासह दिल्लीलाही आला नव्हता. त्याच्यावर काहीदिवस चेन्नईमध्येच उपचार करण्यात आले.

त्यानंतर आता तो 11 ऑक्टोबर रोजी अहमदाबादला पोहचला असल्याचे समजत आहे. तिथे तो भारतीय संघात सामील होईल. भारताला अहमदाबादमध्ये पाकिस्तानविरुद्ध शनिवारी (14 ऑक्टोबर) सामना खेळायचा आहे. मात्र, या सामन्यातही गिलच्या खेळण्यावर प्रश्नचिन्ह असेल.

दरम्यान, असे असले तरी त्याच्या आरोग्याबाबत इशानने अफगाणिस्तानविरुद्धच्या सामन्यानंतर स्टार स्पोर्ट्सच्या कार्यक्रमात रवी शास्त्री, गौतम गंभीर आणि इरफान पठाण यांच्याशी बोलताना सांगितले की 'तो बरा होत आहे आणि बाकी लोकांपेक्षा अधिक वेळाने बरा होतोय. लवकरच तो भारतासाठीही खेळताना दिसेल. तो त्याच्या फिटनेसवरही काम करत आहे.'

तथापि, गिल बरा होत असला, तरी आता तो भारताकडून पुनरागमन कधी करणार हे अद्याप गुलदस्त्यात आहे. तसेच जर गिलचे भारतीय संघात पुनरागमन झाले, तर फलंदाजी फळीतील कोणाच्या जागेवर त्याला संधी द्यायची, याबाबत कठोर निर्णय भारतीय संघव्यवस्थापनाला घ्यावा लागणार आहे.

गिल दमदार फॉर्ममध्ये

गिलने 2023 यावर्षी आत्तापर्यंत 20 वनडे सामन्यांमध्ये खेळताना 72.35 च्या सरासरीने 1230 धावा केल्या आहेत. सध्या यावर्षी वनडेत 1000 धावांचा टप्पा पार करणारा तो एकमेव फलंदाज आहे. त्याने यावर्षी 5 शतके आणि 5 अर्धशतके केली आहेत.