IPL 2024 tentative dates:
इंडियन प्रीमियर लीग (IPL) स्पर्धेचा 17 वा हंगाम यावर्षी खेळवण्यात येणार आहे. गेल्याच महिन्यात म्हणजे डिसेंबर 2023 मध्ये या हंगामाचा लिलाव पार पडला. आता हा हंगाम कधी सुरू होणार याची उत्सुकता अनेक क्रिकेट चाहत्यांना आहे.
दरम्यान, मीडियातील रिपोर्ट्सनुसार आयपीएल 2024 हंगाम 22 मार्च ते 26 मे 2024 दरम्यान खेळवला जाऊ शकतो. हंगामानंतर लगेचच जून 2024 मध्ये कॅरेबियन बेटे (वेस्ट इंडिज) आणि अमेरिकेत टी20 वर्ल्डकपला सुरुवात होणार आहे.
क्रिकबझने दिलेल्या वृत्तानुसार बीसीसीआयने वूमन्स प्रीमियर लीग 2024 (WPL) हंगामाच्या संभाव्य तारखांबाबत त्यांच्या गुंतवणूकदारांशी चर्चा केली आहे. त्यानुसार डब्ल्युपीएलचा हा हंगाम 22 फेब्रुवारी ते 17 मार्च दरम्यान खेळवला जाऊ शकतो. त्यानंतर पाचच दिवसात आयपीएलच्या 17 व्या हंगामाला सुरुवात होऊ शकते.
दरम्यान, लक्षात घेण्यासारखी गोष्ट अशी की अद्याप बीसीसीआयकडून डब्ल्युपीएल आणि आयपीएल यांच्या 2024 मधील हंगामाबाबतच्या तारखांबद्दल अधिकृत माहिती समोर आलेली नाही.
तरी आयपीएल 2024 स्पर्धेच्या तारखा बीसीसीआयला लोकसभा निवडणूकीच्या तारखांनुसार ठरवावे लागणार आहे. दरम्यान, निवडणूकांमुळे हा हंगाम भारतातच होणार की यापूर्वीप्रमाणे परदेशात होणार हे देखील अद्याप अनिश्चित आहे. तरी बीसीसीआयचा प्रयत्न हा हंगाम भारतातच खेळण्याचा असल्याची मीहिती मिळाली होती.
याआधी 2009 साली निवडणूकांमुळे आयपीएलचा हंगाम दक्षिण आफ्रिकेत पार पडला होता, तर 2014 साली आयपीएलचा पहिला टप्पा युएईमध्ये झाला होता, तर दुसरा टप्पा भारतात झाला होता.
तथापि, बीसीसीआयला आयपीएलचे वेळापत्रक तयार करताना केवळ लोकसभा निवडणूकीचाच नाही, तर टी20 वर्ल्डकप 2024 स्पर्धेचाही विचार करावा लागणार आहे. कारण ही स्पर्धा लगेचच 2 जूनपासून सुरू होत आहे. भारताचा पहिला सामना 5 जून रोजी आयर्लंडविरुद्ध होणार आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
