Virat Kohli, Shubman Gill Century: गिलचे विराटच्या पावलावर पाऊल! एकाच सामन्यात दोघांचाही 'सेम टू सेम' रेकॉर्ड

Virat Kohli, Shubman Gill Century: इंडियन प्रीमियर लीग 2023 स्पर्धेत रविवारी रॉयल चॅलेंजर्स बेंगलोर विरुद्ध गुजरात टायटन्स संघात सामना झाला. एम चिन्नास्वामी स्टेडियमवर झालेल्या या सामन्यात गुजरात टायटन्सने 6 विकेट्सने विजय मिळवला. गुजरातच्या या विजयात शुभमन गिलने शतकी खेळी करत मोठा वाटा उचलला.

या सामन्यात बेंगलोरने विराट कोहलीच्या शतकाच्या जोरावर प्रथम फलंदाजी करताना 20 षटकात 5 बाद 197 धावा केल्या होत्या. बेंगलोरकडून विराटने 61 चेंडूत १३ चौकार आणि १ षटकारासह नाबाद 101 धावा केल्या. 

त्यानंतर गुजरातने 198 धावांचे आव्हान 19.1 षटकात 4 विकेट्स गमावत सहज पूर्ण केले. गुजरातकडून शुभमन गिलने 52 चेंडूत 104 धावांची नाबाद खेळी केली. त्याने या खेळीत 5 चौकार आणि 8 षटकार मारले.

विराट - गिलची सलग शतके

दरम्यान, या सामन्यात विराट आणि शुभमन गिलने केलेली ही त्यांची सलग दुसरी शतके ठरली आहेत. विराटने 18 मे रोजी सनरायझर्स हैदराबाद विरुद्ध देखील 100 धावांची शतकी खेळी केली होती. त्यानंतर त्याने आता गुजरातविरुद्धही शतक केले आहे. 

तसेच गिलने देखील याआधी सनरायझर्स हैदराबाविरुद्ध खेळतानाच १५ मे रोजी १०१ धावांची शतकी खेळी केली होती. त्यांनंतर त्याने रविवारी बेंगलोरविरुद्धही शतक केले आहे.

त्यामुळे आयपीएलमध्ये सलग दोन शतके करणारा विराट तिसरा, तर गिल चौथा खेळाडू ठरला आहे. यापूर्वी 2020 आयपीएलमध्ये शिखर धवनने दिल्ली कॅपिटल्सकडून खेळताना आणि 2022 आयपीएलमध्ये जॉस बटलरने राजस्थान रॉयल्सकडून खेळताना सलग दोन शतके केली होती.

गुजरातचा शतकवीर

दरम्यान, गिल हा गुजरात टायटन्सचा एकमेव शतकवीर आहे. तो हैदराबादविरुद्ध खेळताना 15 मे रोजी गुजरातसाठी शतक करणारा पहिला खेळाडू ठरला होता. आता त्याने बेंगलोरविरुद्ध 104 धावांची नाबाद खेळी केल्याने तो गुजरातकडून आयपीएलमध्ये सर्वोच्च धावांची खेळी करणाराही खेळाडू ठरला आहे.

गुजरात टायटन्सकडून सर्वोच्च धावांची खेळी करणारे खेळाडू -

• 104* - शुभमन गिल (विरुद्ध, रॉयल चॅलेंजर्स बेंगलोर, २०२३)

• 101 - शुभमन गिल (विरुद्ध सनरायझर्स हैदराबाद, २०२३)

• 96 - शुभमन गिल (विरुद्ध पंजाब किंग्स, २०२२)

• 94* - डेव्हिड वॉर्नर (विरुद्ध चेन्नई सुपर किंग्स, २०२२)

• 94* - शुभमन गिल (विरुद्ध लखनऊ सुपर जायंट्स, २०२३)