India vs Australia 2nd ODI: ऑस्ट्रेलियन संघाने रविवारी विशाखापट्टणमला झालेल्या वनडे मालिकेतील दुसऱ्या सामन्यात भारताविरुद्ध 10 विकेट्सने विजय मिळवला. या विजयासह ऑस्ट्रेलियाने ३ सामन्यांच्या वनडे मालिकेत 1-1 अशी बरोबरी केली आहे. दरम्यान, या मालिकेतील पहिल्या दोन्ही सामन्यात भारताचा सूर्यकुमार यादव सपशेल अपयशी ठरला आहे.
दुसऱ्या वनडेत सूर्यकुमार यादव पाचव्या षटकात रोहित शर्मा बाद झाल्यावर फलंदाजीला आला होता. पण पहिलाच चेंडू खेळत असताना मिचेल स्टार्कने त्याला पायचीत पकडले. त्यामुळे त्याला शुन्यावरच बाद होऊन माघारी परतावे लागले.
यापूर्वी पहिल्या वनडेत देखील अगदी सारख्याच प्रकारे सूर्यकुमार बाद झाला होता. पहिल्या वनडेमध्ये देखील तो पाचव्या षटकातच विराट बाद झाल्यानंतर फलंदाजीला आला होता. पण पहिलाच चेंडू खेळताना त्याला स्टार्कने पायचीत केले होते.
त्यामुळे त्याला सलग दोन सामन्यात गोल्डन डकवर बाद व्हावे लागले आहे. सूर्यकुमार ऑस्ट्रेलियाविरुद्ध वनडे मालिकेत दोन वेळ गोल्डन डकवर बाद होणारा पाचवा भारतीय क्रिकेटपटू ठरला आहे.
यापूर्वी राहुल द्रविड, सौरव गांगुली, हरभजन सिंग आणि युवराज सिंग यांनी असा नकोसा विक्रम केला आहे. द्रविड आणि गांगुली यांनी 2007 साली झालेल्या वनडे मालिकेत, तर हरभजनने 2009 साली झालेल्या वनडे मालिकेत आणि युवराजने 2013 साली झालेल्या वनडे मालिकेत हा नकोसा विक्रम केला आहे.
साल 2021 मध्ये आंतरराष्ट्रीय क्रिकेटमध्ये पदार्पण केलेला सूर्यकुमार आत्तापर्यंत 5 वेळा शुन्यावर बाद झाला आहे. वनडेमध्ये दोन वेळा आणि आंतरराष्ट्रीय टी20 क्रिकेटमध्ये तीन वेळा शुन्यावर बाद झाला आहे.
रविवारी झालेल्या सामन्यात ऑस्ट्रेलियाने प्रथम गोलंदाजी करताना भारतीय संघाला 26 षटाकत 117 धावांवर रोखले होते. भारताकडून विराट कोहलीने सर्वाधिक 31 धावांची खेळी केली, तर अक्षर पटेलने नाबाद 29 धावा केल्या.
ऑस्ट्रेलियाकडून मिचेल स्टार्कने सर्वाधिक 5 विकेट्स घेतल्या. तसेच सीन ऍबॉटने 3 विकेट्स घेतल्या आणि नॅथन एलिसने 2 विकेट्स घेतल्या.
त्यानंतर 118 धावांच्या आव्हानाचा पाठलाग करताना ऑस्ट्रेलियाकडून ट्रेविस हेड आणि मिचेल मार्श या सलामी जोडीने विकेट न गमावता 11 षटकातच 121 धावा करत विजय निश्चित केला. मार्शने सर्वाधिक नाबाद 66 धावांची खेळी केली. तसेच हेडने नाबाद 51 धावांची खेळी केली.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
