India paddlers Ayhika Mukherjee, Sreeja Akula made history as they beat Chinese World No 1 and No 2 players:
भारताच्या महिला टेबल टेनिस संघाकडून अहिका मुखर्जी आणि श्रीजा अकुला यांनी ऐतिहासिक कामगिरी नोंदवली आहे. सध्या दक्षिण कोरियातील बुसान येथे आयटीटीएफ वर्ल्ड टीम टेबल टेनिस चॅम्पियनशीप स्पर्धा सुरू आहे. या स्पर्धेत शु्क्रवारी भारताचा सामना बलाढ्य चीनविरुद्ध होता.
मात्र, भारतीय संघाने चीनला अखेरपर्यंत विजयासाठी संघर्ष करायला लावला. जागतिक क्रमवारीत १५५ व्या क्रमांकावर असलेल्या अहिकाने अव्वल क्रमांकावर असलेल्या सन यिंगशाला पराभवाचा जोरदार धक्का दिला.
विशेष म्हणजे यिंगशाने आत्तापर्यंत आंतरराष्ट्रीय सांघित स्पर्धेत २६ एकेरी सामन्यात कधीही पराभव स्विकारलेला नव्हता. अहिकाने 12-10, 2-11, 13-11, 11-6 अशा फरकाने यिंगशाला पराभवाचा धक्का दिला.
इतकेच नाही, तर 49 व्या क्रमांकावर असलेल्या श्रीजा अकुलाने दुसऱ्या क्रमांकावरील वँग यिडी हिला पराभवाचा धक्का दिला होता. तिने सरळ तीन सेटमध्ये यिडीला 11-7, 11-9, 13-11 पराभूत केले.
चीनच्या जागतिक क्रमवारीतील पहिल्या आणि दुसऱ्या क्रमांकावरील खेळाडू पराभूत झाल्याने त्यांना चांगलाच धक्का बसला होता. मात्र, नंतर चीनने पुनरागमन करता भारताविरुद्धची लढाई 3-2 फरकाने जिंकली.
या लढतीत भारताची स्टार खेळाडू मनिका बत्राला वँग मन्यू आणि यिंगशा विरुद्ध दोन्ही सामन्यात पराभवाचा सामना करावा लागला. तिला मन्यूने 3-11, 8-11, 15-13, 7-11 अशा फरकाने पराभूत केले, तर यिंगशाने 3-11, 6-11, 13-11, 9-11 अशा फरकाने पराभव केला.
याशिवाय अखेरचा आणि निर्णायक सामना अहिका चौथ्या क्रमांकावरील मन्यू विरुद्ध खेळली. मात्र तिला या सामन्यात विजय मिळवण्यात अपयश आले. तिला मन्युने 9-11, 11-13, 6-11 अशा फरकाने पराभूत केले.
चीनने या लढतीत अटीतटीचा विजय मिळवला असला, तरी 2010 नंतर पहिल्यांदाच चीनने चॅम्पियनशीपमध्ये दोन सामने पराभूत झाले आहेत. यापूर्वी गेल्या 14 वर्षात टेबल टेनिसमध्ये चीनचेच वर्चस्व राहिले आहे.
दरम्यान, भारताचा पुढील सामना आता हंगेरीविरुद्ध रविवारी (18 फेब्रुवारी) होणार आहे. या लढतीला दुपारी 1.30 वाजता सुरुवात होईल. या स्पर्धेतून पॅरिस ऑलिम्पिकसाठी पात्र ठरण्यासाठी भारतीय संघाचा प्रयत्न आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.