Tilak Varma Congratulates Dewald Brevis on Maiden South Africa Call-up:
दक्षिण आफ्रिका क्रिकेट बोर्डाने ऑस्ट्रेलियाविरुद्धच्या आगामी वनडे आणि टी20 मालिकेसाठी संघाची घोषणा केली आहे. या दोन्ही मालिकांसाठी दक्षिण आफ्रिकेच्या संघात पहिल्यांदाच डेवाल्ड ब्रेविसचा समावेश करण्यात आला आहे.
महत्त्वाचे म्हणजे भारतात 5 ऑक्टोबरपासून सुरू होणाऱ्या वर्ल्डकपपूर्वी ब्रेविसचा दक्षिण आफ्रिका संघात समावेश झाल्याने त्यादृष्टीने ही मोठी गोष्ट मानली जात आहे. त्याचमुळे त्याचे खास अभिनंदन त्याचा जवळचा मित्र तिलक वर्माने केले आहे.
तिलक आणि ब्रेविस हे दोघेही आयपीएलमध्ये मुंबई इंडियन्सकडून एकत्र खेळतात. त्यामुळे त्यांच्यात घट्ट मैत्री आहे. त्याचमुळे ब्रेविसला पहिल्यांदाच राष्ट्रीय संघात संधी मिळाल्याबद्दल तिलकने त्याला व्हिडिओ कॉल केला होता.
याचा फोटोही तिलकने सोशल मीडियावर शेअर केला आहे. त्याने इंस्टाग्राम स्टोरीला त्यांच्या व्हिडिओ कॉलचा फोटो शेअर केला आहे. तसेच या फोटोला कॅप्शन दिले आहे की 'पहिल्यांदाच निवड झाल्याबद्दल अभिनंदन भावा. तुझ्यासाठी खूप आनंदी आहे आणि तुझा अभिमान वाटत आहे.'
दरम्यान, ब्रेविस हा दक्षिण आफ्रिकेचा भविष्यातील स्टार खेळाडू समजला जातो. त्याला एबी डिविलियर्सचा वारसदारही समजले जाते.
तिलकनेही काही दिवसांपूर्वीच म्हणजेच 3 ऑगस्ट रोजी वेस्ट इंडिजविरुद्ध टी20 मालिकेतील पहिल्या सामन्यातून आंतरराष्ट्रीय क्रिकेटमध्ये पदार्पण केले होते. त्याने पदार्पणाच्या टी20 मालिकेतच सर्वांना प्रभावित केले.
दरम्यान, पहिल्याच सामन्यात त्याने 22 चेंडूत 2 चौकार आणि 3 षटकारांसह 39 धावांची खेळी केली. ही खेळी करताना दुसऱ्या आणि तिसऱ्याच चेंडूवर त्याने सलग दोन षटकार मारले होते.
त्याच्या या कामगिरीनंतर ब्रेविसने त्याच्यासाठी व्हिडिओ मेसेज दिला होता. ज्यात त्याने तिलकचे अभिनंदन केले होते, तसेच त्याचे कौतुकही केले होते. याशिवाय त्याच्या कुटुंबाकडूनही त्याला शुभेच्छा दिल्या होत्या.
दक्षिण आफ्रिकेला मायदेशात ऑस्ट्रेलियाविरुद्ध 3 टी20 आणि 5 वनडे सामन्यांच्या मालिका खेळायच्या आहेत. टी20 मालिका 30 ऑगस्ट ते 3 सप्टेंबर दरम्यान होईल, तर वनडे मालिका 7 ते 17 सप्टेंबर दरम्यान होणार आहे.
वनडे संघ - तेंम्बा बावुमा (कर्णधार), डेवाल्ड ब्रेव्हिस, गेराल्ड कोएत्झी, क्विंटन डी कॉक, ब्योर्न फॉर्च्युइन, रीझा हेंड्रिक्स, मार्को यान्सिन, हेन्रिक क्लासेन, सिसांडा मॅगाला, केशव महाराज, एडेन मार्कराम, डेव्हिड मिलर, लुंगी एन्गिडी, एन्रिक नॉर्किया, ताब्राईज शम्सी, वेन पार्नेल, कागिसो रबाडा, ट्रिस्टन स्टब्स आणि रस्सी वॅन डर द्युसेन.
टी20 संघ - एडन मार्कराम (कर्णधार), तेम्बा बावुमा, मॅथ्यू ब्रेट्झके, डेवाल्ड ब्रेविस, गेराल्ड कोएत्झी, डोनोव्हन फरेरा, ब्योर्न फॉर्च्युइन, रीझा हेंड्रिक्स, मार्को यान्सिन, सिसांडा मगला, केशव महाराज, लुंगी एन्गिडी, ताब्राईज शम्सी,, ट्रिस्टन विल्यम्स, ट्रिस्टन स्टब्स आणि लिझाड विलियम्स आणि रस्सी वॅन डर द्युसेन.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.