अंतिम टप्प्यात निर्णायक फलंदाजी, क्रिकेट स्पर्धेत महिलांनी मारली बाजी

पणजी : डावातील नऊ चेंडू बाकी असताना विजयासाठी 16 धावांची गरज होती, निर्णायक टप्प्यावर विनवी गुरव व निकिता मळीक यांनी समजूतदार फलंदाजी केली. त्यामुळे गोव्याला सीनियर महिला टी-20 क्रिकेट स्पर्धेत सोमवारी विजयी सलामी देता आली.

मोहाली येथील आय. एस. बिंद्रा क्रिकेट (Cricket) स्टेडियमवर प्रकाशझोतात झालेल्या लढतीत गोव्याने एलिट ड गटात गुजरातला चार विकेट्स व एक चेंडू राखून हरवले. गोव्याची कर्णधार शिखा पांडे (2-25) व पूर्वा भाईडकर (2-12) यांनी गुजरातला 7 बाद 103 असे रोखले. नंतर गोव्याने 19.5 षटकांत 6 बाद 104 धावा करून सामना जिंकला.

गोव्याला (goa) विजयासाठी नऊ चेंडूंत 16 धावा हव्या असताना जम बसलेली सुनंदा येत्रेकर (20) बाद झाली. विनवी (नाबाद 20, 19 चेंडू, 2 चाैकार) हिने निकिता (नाबाद 6) हिच्या साथीत एक चेंडू राखून गोव्याला विजय मिळवून दिला. त्यापूर्वी गोव्याचा संघ 4 बाद 46 असा संकटात सापडल्यानंतर कर्णधार शिखा (22) व सुनंदाने संघाला सावरले.

संक्षिप्त धावफलक

गुजरात ः 20 षटकांत 7 बाद 103 (सिमरन 45, रेणुका चौधरी 10, भावना गोपलानी 15, शिखा पांडे 2-25, निकिता मळीक 0-11, सुनंदा येत्रेकर 0-11, पूर्वा भाईडकर 2-12, रुपाली चव्हाण 1-20, संजुला नाईक 0-7, तेजस्विनी दुर्गड 1-14

) पराभूत वि. गोवा ः 19.5 षटकांत 6 बाद 104 (पूर्वजा वेर्लेकर 10, श्रेया परब 12, तेजस्विनी दुर्गड 5, शिखा पांडे 22, संजुला नाईक 6, सुनंदा येत्रेकर 20, विनवी गुरव नाबाद 20, निकिता मळीक नाबाद 6, रेणुका चौधरी 3-23, हिरलबेन सोळंकी 2-11, स्तुती जैन 1-10).