Berlin Special Olympic: गोव्याच्या कन्यांनी गाजवले बर्लिन; स्पेशल ऑलिंपिकध्ये जिंकले एक सुवर्ण, एक ब्राँझपदक

Goan Girls in Berlin Special Olympic: बर्लिन येथे सुरू असलेल्या स्पेशल ऑलिंपिकमध्ये गोव्याच्या दोन मुलींनी पदकांची लयलूट केली आहे. गीतांजली नागवेकर हीने लेव्हल डी 800 मीटर प्रकारात सुवर्णपदक जिंकले आहे तर तानिया उल्हास उसगावकर हीने रोलर स्केटिंग प्रकारात ब्राँझपदक जिंकले आहे.

बर्लिनमध्ये ही जागतिक स्पर्धा सुरू असून विशेष क्रीडापटूंसाठी दर दोन वर्षांनी ही स्पर्धा होते. या स्पर्धेत 7,000 हून अधिक खेळाडू सहभागी झाले आहेत. विविध 26 क्रीडा प्रकारात ही स्पर्धा होत आहे.

दरम्यान, गीतांजली ही मूळची गोव्यातील नेरूळ येथील आहे. तिने कुद्रियावत्सेवा काटेरिना (युक्रेन) आणि वॅट्स जोलिन (कॅनडा) यांना मागे टाकत सुवर्णपदक जिंकले.

गीतांजलीची आई रश्मी यांनी सांगितले की, गीतांजलीला व्हिक्टर वाझ या तिच्या शिक्षकांचे मोलाचे मार्गदर्शन लाभले आहे. गीतांजली या स्पर्धेत 400 मीटर, 800 मीटर आणि 4x400 मीटर रिलेमध्ये भारताचे प्रतिनिधित्व करत आहे.

तर तानिया उल्हास उसगावकर हीने 30 मीटर रोलर स्केटिंग प्रकारात ब्राँझ पदक जिंकले आहे.