पणजीः दिल्ली (Delhi) दौरा आटोपून गोव्याचा सीनियर क्रिकेट संघ पाच ऑक्टोबरला गोव्यात परतणार आहे. त्यानंतर काही दिवस विश्रांती घेऊन संघ घरच्या मैदानावरच सराव करेल, अशी माहिती गोवा क्रिकेट असोसिएशनचे (Goa Cricket Association) सचिव विपुल फडके (Vipul Fadke) यांनी दिली. पुदुचेरीत स्पर्धात्मक क्रिकेट सराव अशक्य ठरल्यानंतर गोव्याचा संघ दिल्लीस रवाना झाला असून ते काही सराव सामने खेळेल. सेनादलाविरुद्ध सामना झाला आहे. हरियाना, दिल्लीविरुद्ध सामने नियोजित आहेत. शिवाय काही क्लब संघाविरुद्धही लढती होतील, असे फडके यांनी सांगितले.
‘‘दोन महिन्यांपेक्षा जास्त काळ गोव्याचे क्रिकेटपटू परगावी असतील. नोव्हेंबरमध्ये होणाऱ्या सय्यद मुश्ताक अली करंडक टी-20 स्पर्धेपूर्वी नियमानुसार विलगीकरण असेल. त्यापूर्वी खेळाडूंना आवश्यक विश्रांती मिळावी असे मत मुख्य प्रशिक्षक के. भास्कर पिल्लई यांनी नोंदविले आहे. त्यानुसार, गोव्यात परतल्यानंतर काही दिवस खेळाडूंना आराम मिळेल. त्यानंतर गोव्यात सराव सत्र होईल, तसेच 25 वर्षांखालील संघाविरुद्धही सामने खेळले जातील,’’ अशी माहिती फडके यांनी दिली. सय्यद मुश्ताक अली करंडक टी-20 क्रिकेट स्पर्धेत गोव्याचा एलिट अ गटात समावेश आहे. पंजाब, तमिळनाडू, ओडिशा, महाराष्ट्र, पुदुचेरी हे गोव्याचे गटातील प्रतिस्पर्धी आहेत. स्पर्धा चार नोव्हेंबरपासून लखनौ येथे खेळली जाईल. स्पर्धा नियमानुसार स्पर्धा केंद्रावर संघाचे कोविड-19 प्रतिबंधक विलगीकरण 27 ऑक्टोबरपासून सुरू होईल. त्यामुळे 26 ऑक्टोबरपर्यंत गोव्याच्या संघाला लखनौ येथे दाखल व्हावे लागेल.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
