व्हेटरन्स क्रिकेट स्पर्धेत मडगाव, डिचोली-सत्तरीचे विजय

पणजी : अखिल गोवा व्हेटरन्स क्रिकेट स्पर्धेत शुक्रवारी मडगावने फोंडा संघावर नऊ विकेट, तर डिचोली-सत्तरी संघाने पणजीवर चार विकेट राखून मात केली.

पर्वरी येथे सामन्याच्या प्रारंभ माजी सभापती डॉ. राजेश पाटणेकर, गोवा व्हेटरन्स क्रिकेट असोसिएशनचे अध्यक्ष विनोद फडते यांच्या उपस्थितीत झाला. सांगे येथे स्पर्धेचे उद्‍घाटन डॉ. सतीश कुडचडकर यांनी केले.

सांगे मैदानावर मडगाव व फोंडा यांच्यातील सामना एकतर्फी ठरला. नितीन कालेकर, प्रशांत लोटलीकर व सुदेश प्रभुदेसाई यांनी फोंड्याचा डाव 93 धावांत गुंडाळल्यानंतर दामोदर रेडकरच्या नाबाद अर्धशतकाच्या बळावर मडगाव संघाने सामना 15.2 षटकांत एका विकेटच्या मोबदल्यात जिंकला.

पर्वरी येथे पणजी व्हेटरन्सने 9 बाद 139 धावा केल्या. नंतर प्रसाद सुर्लकर, ऋषिकेश यांच्या शानदार फलंदाजीच्या जोरावर डिचोली-सत्तरी संघाने चार विकेट व सहा चेंडू राखून विजय मिळविला.

संक्षिप्त धावफलक

फोंडा व्हेटरन्स : 20 षटकांत सर्वबाद 93 (जयेश बोरकर 27, रघुवीर लोटलीकर 18, नितीन कालेकर 2-15, प्रशांत लोटलीकर 3-10, सुदेश प्रभुदेसाई 2-9, व्यंकटेश नेवगी 2-5, शैलेश नाईक 1 विकेट) पराभूत वि. मडगाव व्हेटरन्स : 15.2 षटकांत 1 बाद 94 (दामोदर रेडकर नाबाद 50, आशिष पाटणेकर नाबाद 28 धावा, रघुवीर लोटलीकर 1 विकेट), सामनावीर : दामोदर रेडकर.

पणजी व्हेटरन्स : 20 षटकांत 9 बाद 139 (स्विटेश वेर्णेकर 34, इफ्तिकार आगा 25, देविदास खोलकर 26, विनय पालेकर 21, सूरज सावळ 2-23, अभिजित तळेकर 2-24, संदेश ठाकूर, विजय कुडतरकर प्रत्येकी 1 विकेट) पराभूत वि. डिचोली-सत्तरी : 19 षटकांत 6 बाद 140 (प्रसाद सुर्लकर 40, ऋषिकेश 32, कैलास 28, विनय पालेकर 3-26, कपिले आंगले, ॲमलॉन डिसोझा, आनंद माजाळीकर प्रत्येकी 1 विकेट), सामनावीर :अभिजित तळेकर.