Chess Tournament : शांतादुर्गा, विद्याविहार हायस्कूल बुद्धिबळात विजेते

Chess Tournament : क्रीडा व युवा व्यवहार संचालनलयातर्फे घेण्यात आलेल्या १४ वर्षांखालील मिनी-सेकंडरी शालेय बुद्धिबळ स्पर्धेत राज्यस्तरीय पातळीवर मुलांत डिचोलीच्या श्री शांतादुर्गा हायस्कूलने, तर मुलींत ठाणे-कुठ्ठाळी येथील विद्याविहार हायस्कूलने विजेतेपद पटकावले. स्पर्धा बुधवारी मिरामार येथील यूथ हॉस्टेलमध्ये झाली.

मुलांच्या अंतिम लढतीत श्री शांतादुर्गा हायस्कूलने मडगावच्या मनोविकास इंग्लिश स्कूलवर ४-० डावफरकाने विजय मिळविला. तिसरा क्रमांक मिरामारच्या शारदा मंदिर स्कूलला मिळाला. त्यांनी फोंड्याच्या ए. जे. द आल्मेदा हायस्कूलला ३-१ डावफरकाने नमविले.

मुलींची अंतिम लढत चुरशीची ठरली. विद्याविहार हायस्कूलने मिरामारच्या शारदा मंदिर स्कूलला ४-३ असे निसटत्या डावफरकाने पराजित केले. आल्मेदा हायस्कूलला तिसरा क्रमांक मिळाला. त्यांनी डिचोलीच्या श्री शांतादुर्गा हायस्कूलला ४-२ फरकाने हरविले.

क्रीडा खात्याचे राज्यस्तरीय क्रीडा आयोजक अनंत सावळ यांच्या मार्गदर्शनाखाली स्पर्धा झाली. दत्ताराम पिंगे स्पर्धेचे आर्बिटर होते.