Goa Boxer : गोव्याच्या बॉक्सरचा आंतरराष्ट्रीय 'पंच'; 'ही' कामगीरी करणारी देशातील पहिली महिला

Goa Boxer : गोव्याच्या दानुष्का दा गामा यांनी बॉक्सिंगमधील आंतरराष्ट्रीय तांत्रिक अधिकारी (आयटीओ) परीक्षेत यश प्राप्त केले. त्या देशातील महिला बॉक्सिंग आयटीओ बनल्या आहेत.

आयटीओ परीक्षा थायलंडमधील बँकॉक येथे झाली. त्यात जगभरातील 24 उमेदवारांनी भाग घेतला. भारतीय बॉक्सिंग महासंघातर्फे चार जणांचा समावेश होता. त्यापैकी दानुष्का यांनी आवश्यक निकष पूर्ण करून परीक्षेत उत्तीर्ण होण्याचा मान मिळविला.

बँकॉक येथे 18 ते 22 जानेवारी या कालावधीत 22 वर्षांखालील आशियाई बॉक्सिंग स्पर्धा झाली, त्यावेळी परीक्षा घेण्यात आली होती. आंतरराष्ट्रीय बॉक्सिंग महासंघातर्फे सोमवारी (ता. १३ फेब्रुवारी) निकाल जाहीर करण्यात आला. दानुष्कासह जगभरातून फक्त सहा जण प्रतिष्ठेची परीक्षा उत्तीर्ण झाले.

आंतरराष्ट्रीय स्पर्धेसाठी पात्र

आयटीओ परीक्षेत उत्तीर्ण झाल्यामुळे दानुष्का आता जागतिक, तसेच आंतरराष्ट्रीय बॉक्सिंग स्पर्धेत आयटीओ या नात्याने कार्य बजावू शकतील. भारतीय बॉक्सिंगसाठी दानुष्काची कामगिरी भूषणावह असल्याचे मत गोव्याचे ज्येष्ठ आयटीओ लेनी डिगामा यांनी व्यक्त केली.

बॉक्सिंगमध्ये सुरवातीपासून सक्रिय

दानुष्का या गोव्याच्या माजी महिला बॉक्सरही आहेत. त्या भारतीय बॉक्सिंग महासंघाच्या संयुक्त सचिव असून गोवा हौशी बॉक्सिंग संघटनेच्या कार्यकारिणी सदस्य आहेत.