Santosh Trophy: गोव्याची विजयी सलामी; यजमान आसामवर 1-0 ने मात

Santosh Trophy Football : माजी विजेत्या गोव्याने 76 व्या संतोष करंडक राष्ट्रीय फुटबॉल स्पर्धेत विजयी सलामी दिली. त्यांनी यजमान आसामला चुरशीच्या लढतीत 1-0 फरकाने हरविले. आसाममधील कोक्राझार येथे झालेल्या लढतीत स्टेन्डली फर्नांडिस याने 49 व्या मिनिटास केलेला गोल निर्णायक ठरला.

क्लेन्सियो पिंटो याच्या असिस्टवर स्टेन्डली याने सणसणीत फटक्यावर आसामच्या गोलरक्षकाला सावरण्याची संधीच दिली नाही. 74 व्या मिनिटास स्टेन्डली याची संधी हुकली, त्यामुळे आघाडी एका गोलपुरती मर्यादित राहिली. गोव्याचा गटसाखळीतील पुढील सामना शुक्रवारी (ता. 30) उत्तर प्रदेशविरुद्ध होईल.