FC Goa in ISL Football: भुवनेश्वरमधील कलिंगा स्टेडियमवर एफसी गोवा संघाने एका मिनिटातील थरारनाट्यात बाजी मारली. या कालावधीत त्यांनी दोन गोल करून ईस्ट बंगालविरुद्ध पिछाडी भरून काढली आणि इंडियन सुपर लीग (आयएसएल) फुटबॉल स्पर्धेत शनिवारी सलग तिसऱ्या विजयाची नोंद केली.
संदेश झिंगन व व्हिक्टर रॉड्रिगेझ यांनी अनुक्रमे ७४व्या व ७५व्या मिनिटास केलेल्या गोलच्या बळावर एफसी गोवाने सामना २-१ फरकाने जिंकला. त्यापूर्वी नाओरेम महेश सिंग याने ४१व्या मिनिटास केलेल्या गोलमुळे ईस्ट बंगाल संघ आघाडीवर होता.
एफसी गोवाचे आता लागोपाठच्या तीन विजयामुळे नऊ गुण झाले आहेत, तर ईस्ट बंगालला सलग दुसरा पराभव पत्करावा लागला. त्यामुळे चार लढतीनंतर त्यांचे चार गुण कायम राहिले.
नंदकुमार शेखरच्या पासवर महेश सिंग याला रोखणे एफसी गोवाच्या बचावफळीस शक्य झाले नाही. त्याला लाभ उठवत त्याने ईस्ट बंगालला विश्रांतीपूर्वी आघाडी मिळवून दिली. अखेरच्या १६ मिनिटांतील खेळ बाकी असताना सामन्याचे पारडे फिरले.
व्हिक्टर रॉड्रिगेझच्या शानदार क्रॉसपासवर संदेश झिंगनचे हेडिंग भेदक ठरले आणि एफसी गोवाने बरोबरी साधली.
त्यानंतर पुढच्याच मिनिटास व्हिक्टरने स्वतः गोल केला, जो एफसी गोवासाठी निर्णायक ठरला. कार्लोस मार्टिनेझच्या असिस्टवर त्याचा डावा पायाचा फटका सुसाट ठरला.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.