National Games 2023 Goa: राष्ट्रीय क्रीडा स्पर्धेत आसामला पहिले सुवर्णपदक, महाराष्ट्राला उपविजेतेपद

National Games 2023 Goa: आसामच्या महिला बॅडमिंटन संघाने ३७व्या राष्ट्रीय क्रीडा स्पर्धेतील पहिले सुवर्णपदक जिंकण्याचा मान मिळविला. सांघिक गटातील अंतिम लढतीत त्यांनी महाराष्ट्राला ३-० फरकाने हरवून विजेतेपद पटकावले. महाराष्ट्राला उपविजेतेपदावर समाधान मानावे लागले.

बॅडमिंटन स्पर्धा ताळगाव पठारावरील डॉ. श्यामाप्रसाद मुखर्जी इनडोअर स्टेडियममध्ये सुरू आहे. सांघिक अंतिम लढती शनिवारी झाल्या.

महिला सांघिक अंतिम लढतीत अश्मिता चलिहा हिने आसामला १-० अशी आघाडी मिळवून दिली. तिने महाराष्ट्राच्या पूर्वा बर्वे हिला २१-१६, २१-११ असे ३३ मिनिटांत नमविले. दुसऱ्या एकेरीत ईशारानी बरुआ हिने आलिशा नाईक हिला पहिला गेम गमावल्यानंतर ४० मिनिटांत ९-२१, २१-१३, २१-१८ असे पराजित केले.

२-० या आघाडीनंतर दुहेरीत बाजी मारत आसामने सुवर्णपदक निश्चित केले. दुहेरीत ईशारानी व अश्मिता जोडीने सिमरन सिंघी व रितिका ठाकर जोडीला २१-१९, २१-१३ असे नमवून आसामच्या स्पर्धेतील पहिल्या सुवर्णपदकावर शिक्कामोर्तब केले.