एथनला बुद्धिबळात सांघिक सुवर्णपदक

पणजी: गोमंतकीय युवा बुद्धिबळपटू (Chess) एथन वाझ याचा समावेश असलेल्या भारत अ संघाने आशियाई शालेय ऑनलाईन बुद्धिबळ स्पर्धेत 11 वर्षांखालील गटात सांघिक सुवर्णपदक जिंकले. फिलिपिन्स राष्ट्रीय बुद्धिबळ महासंघाने आशियाई बुद्धिबळ महासंघ आणि आंतरराष्ट्रीय बुद्धिबळ महासंघ (फिडे) यांच्या मान्यतेने स्पर्धा घेतली होती. (Ethan Vaz of Goa won the team gold medal in chess)

भारत अ संघात तमिळनाडूचा जी. आकाश, केरळचा कृष्ण गौतम, आसामचा मृण्मय राजखोवा व गोव्याचा एथन वाझ यांचा समावेश होता. या संघाने भारत ब व इराण अ संघाला मागे टाकत विजेतेपद पटकाविले. यावर्षी जुलैमध्ये घेण्यात आलेल्या ऑनलाईन राष्ट्रीय बुद्धिबळ स्पर्धेत तिसरा क्रमांक मिळविल्यामुळे एथनची आशियाई शालेय बुद्धिबळ स्पर्धेसाठी भारतीय संघात निवड झाली होती.

सांघिक सुवर्णपदक विजेत्या एथनचे गोवा बुद्धिबळ संघटनेचे अध्यक्ष वीजमंत्री नीलेश काब्राल यांनी अभिनंदन केले आहे. सातत्यपूर्ण कामगिरीच्या बळावर एथनने भारतीय संघातर्फे सुवर्णपदक जिंकले आहे, जे गोमंतकीयांसाठी अभिमानास्पद आहे. गोमंतकीय बुद्धिबळासाठी हा मानाचा क्षण आहे, असे काब्राल यांनी नमूद केले. गोवा बुद्धिबळ संघटनेचे सचिव किशोर बांदेकर यांनी सांगितले, की भारतातर्फे खेळतान एथनचे हे तिसरे आंतरराष्ट्रीय पदक आहे. 2019 साली पश्चिम आशियाई बुद्धिबळ स्पर्धेत त्याने रॅपिड बुद्धिबळात वैयक्तिक सुवर्ण, तर ब्लिट्झ बुद्धिबळात वैयक्तिक रौप्यपदक जिंकले होते. एथन सां जुझे द आरियल येथील द किंग्ज स्कूलचा पाचव्या इयत्तेतील विद्यार्थी आहे. मडगाव येथील चेस गुरू गोवा अकादमीत त्याला प्रकाश विक्रम सिंग यांचे मार्गदर्शन लाभते.